මම කාටවත් වෛර කරන්නෙ නැහැ! අපෙ හාමුදුරුවනේ!

Posted on October 5, 2010



හාමුදුරුවො දන්නවනෙ. ආයෙ කියන්න ඕනෙ නෑනෙ. මං කාටවත් වෛර කරන්නෙ නැහැ. ඒත් හැමදේම කරන්න පිළිවෙලක් තියෙනවනෙ.

මමම දාපු කොමිටිය වෙච්චි. මමම දාපු පැමිණිල්ල වෙච්චි. ඉතින් මට පුලුවන් ද අත්සන් නොකර ඉන්න.

ඒත් මගේ වෛරයක් නම් නෑ හාමුදුරුවනේ.

ඇත්තටම පිළිවෙලකට ඉල්ලනව නම් සමාව දෙන්න වුනත් මං ලෑස්තියි.

දැන් ඉතින් පන්දුව ඇත්තේ ප්‍රශ්නය අහපු හාමුදුරුවන් අතේ ය. ඒ පන්දුවට එහිමියන් කුමක් ‍කළේ දැයි අප දන්නේ නැත.

මල්වතු හා අස්ගිරි මහා නාහිමියන් ඇතුළු නායක හිමියන්ගේ ඉල්ලීමට ද කුමක් සිදුවූයේ දැයි අප දන්නේ නැත. හොයාගන්න විදිහක් ද නැත.

අප දන්නේ එකම දෙයකි. ඒ අප පින්වත් සංවේදී රජතුමා කුරා කුහුඹියෙකුටවත් වෛර නොකරන බව ය.

කෑවනම් බිව්වනම් දැන් තියෙන්නේ නිදා ගන්න ය.

දානේ වැළදුවානම් පිරිකර ලැබුනා නම් දැන් තියෙන්නේ භුක්තානුමෝදනා බණ කීමට ය. එතකොට අපටත් එක හුස්මට නිදාගන්න ඉඩ ලැබෙන්නේ ය.

(ඔය මොකාද හිරෙ යන්න ලෑස්තිවෙල ඉන්නවැයි කියන්නෙ. සහපිරිවරින්. යන්නම ඕනනම් යන එකනෙ තියෙන්නෙ. හදල දෙන්නද මාර්ගයක්..)

නහි වේරෙන වේරානි, සම්මන්තී ද කුදාචනං, අවේරෙනච සම්මන්ති, ඒච ධම්මො සනුච්චනෝ!

සාදු සාදු සාදු!

(අවසාන වශයෙනුත් කියන්න තියෙන්නේ අපේ රජතුමා කුරා කුහුඹියෙකුටවත් වෛර නොකරන පෝයට බණ අහන හිටිහැටියේ බණ දෙසන හොද බෞද්ධයෙකු බව ය. නිකම්ම නිකම් බෞද්ධයෙකු නොව හොද සිංහල බෞද්ධයෙකු බව ය. පැරණි සිංහල වංශකතාවේ අලුත් පිටු පෙරලන රජ පෙළපතක සිරිය එතුමා තුළින් අභිමානවත් ලෙස පල කෙරෙන බව ය.

ඒ වංශ කතාවේ මෙහෙම එකක් ද තිබේ. එකෝමත් එක කාලෙක රජකෙනෙක් ගිලෙන්නට ගියේ ය. ඒ දුටු පුරවැසියෙක් තටාකයට පැන රජතුමා කෙස්වල්ලෙන් අල්ලාගෙන ගොඩ ගත්තේ ය. වංශ කතාවේ සදහන් විදිහට තිබෙන්නේ රජතුමා ගිලෙන්නට ගොස් බේරා ගත් එකා රජුගේ කෙස්වල්ලෙන් ඇල්ලුවේ යැයි චෝදනා කොට හිස ගසා දැමූ බව ය. අපේ රාජ පෙළපත එහෙම ය. සැබැවින්ම අභිමානවත් ය.

ජය ශ්‍රී! )

Posted in: Uncategorized