විනය කමිටුව මර්වින් නිදොස් කොට නිදහස් කරයි! රග පා ඇත්තේ වීදි නාට්‍යයකි!

විනය කමිටුව මර්වින් නිදොස් කොට නිදහස් කරයි! මේ බව අප පමණක්‍ නොව තව බොහෝ දෙනෙකු ද කීවේ මර්වින් අස් කොට විනය කමිටුව පත් කළ දා ය. ඒ නිසා මෙය අපට නිව්ස් එකක් නොවේ ය.

එහෙත් මේ නිදොස් කරමින් කමිටුව ඉදිරිපත් කරන ලද කාරණය අතිශයින් හාස්‍ය ජනක ය. ඒ ගැන පළමුව සළකා බැලිය යුත්තේ ය. විනය මණ්ඩලය ගස් බැදි පුද්ගලයා දුන් දිවුරුම් ප්‍රකාශයක් සළකා බලා තීන්දුව දී ඇත. ඊට අනුව මේ සිදුකර ඇත්තේ රංගනයකි. ඒ සදහා තමන් සහභාගීවී ඇත්තේ කැමැත්තෙනි.

ඇත්තටම අපි බලා සිටින සියල්ල  රංගනයන් බව කවුරුවත් දිවුරුම් ප්‍රකාශ නුදුන්නාට අපි දනිමු. එහෙත් මෙසේ එලිපිට එය රංගනයක් බව නාට්‍යයේ අධ්‍යක්ෂවරුන්ම කියන විට ගොනාට ඇද ගත් ජනතාවට කුමක් සිතෙනු ඇත් ද?

මර්වින්ගේ ගරු රගපෑම් ගැන ඒ විච්චූරණය ඇති ය.

අප ඉතිරිය ලියන්නේ මේ නිසා උද්ඝෝෂණය කළ සමෘද්ධි නියාමකයන්ට හා මේ සම්බන්ධයෙන් විස්සෝප වූ අයට කුමක් සිදුවේද යන්න ගැන උපන් අනුකම්පාවෙන් පමණකි.

අවශ්‍ය නම් ටික කලක් හෝ ඇමති පදවිය නැතිව ඉන්නට සිදුවීමම මර්වියා ලද දඩුවමකැයි සිතා පුරුදු විදිහට සමෘද්ධි නියාමකයන්ට තමන්ගේ රාජකාරි කරගෙන යා හැකි ය. ඇත්තටම මට හිතෙන්නේ ඔවුන්ට ඉතිරිව ඇත්තේ එය පමණක් බව ය.

රජයේ නිලධාරීන්ට පොදුවේ මේ ගැන රිදීමක් ඇතිව තිබුනේ නම් උන්ට ද දැන් ඉතින් මොනවා කරන්න ද සමහර විට මර්වියා ඔයින් පාඩමක් ඉගෙනගන්නට ඇතැයි සිතා හිත පහදා ගත හැකි ය.

ඇත්තටම මේ ගමන නම් ජනාධිපති තුමා සාධාරණය ඉටු කරනු ඇතැයි සිතූ රාජපාක්ෂිකයින් කොහොම හිත හදා ගනී ද? මුකුත්ම නොකර ඉන්නේ නැතිව ඔහොමවත් කළා මදැයි කියා උන්ට ද හිත හදා ගත හැකි ය.

මර්වියාගේ ඇමති පට්ටම නැතිවුන කල ඒ ගැන ආණ්ඩුව වැනූ වන්දිභට්ටෙලා කොහොම මේක උහුලා ගනි ද? හැම පවක්ම කරගහන උන්ට ඇත්තේ දිව අනිත් පැත්තට නමන්නට පමණි. එය අපේ උදව්පදව් නැතිවම උන් කරගනු ඇත.

එතකොට සියල්ල හරි ය.

ඊලග වීදි නාට්‍ය සදහා මර්වින් වෙස් බදින තුරු අපිදු එකත්පස්ව බලා හිදිමු. වෙන මක්කා කොරන්න ද?

එහෙම ඉන්නා අතරේ රංගනයක් සැබෑ ජිවි‍තයෙන් වෙන්කර ගන්නේ කෙසේදැයි සොයා බලන එක හොද ය. නැතිනම් වන්නේ සමෘද්ධි නිලධාරීන්ට වූ ඇබැද්දිය ය. ප්‍රදර්ශනය කරන නාට්‍ය ඇත්ත ලෙස කල්පනා කොට ප්‍රේක්ෂකයන් පෙළපාලි යන්නට ඉඩ තිබෙන බැවිනි. එහෙම වුනහම සවුත්තු වන්නේ සිරීයස් ගහගෙන පෙළපාලි ගිය අය ය.

පුංචි සැකයක් බයක් හැටියට ඉතිරිව ඇත්තේ මර්වින්ගේ විදී නාට්‍යයක චරිතයක් සදහා ගරු රගපෑමකට ආරාධනාවක් කොයිවෙලේ හෝ ලැබෙයිද කියා ය. එහෙම එකක් අල්ලපු ගෙදර එකාට මිසක් තමාට නොලැබේවා කියා හතර මහා දේවා‍ලයට ගොස් පඩුරු බැද ඔප්පු කිරිම සදහා සූදානම් සරීරයෙන් සිටිය මනා ය.

Tagged: ආණ්ඩුව, ඇමති පදවිය, ගස් බැදීම, දඩුවම, නරි නාටක, නාටක, නාඩගම්, නිදහස්, නිදොස්, නිව්ස්, නීතියේ ආධිපත්‍යය, මර්වින්, මර්වියා, මෛත්‍රීපාල සිරිසේන, විගඩම, විදී නාට්‍ය, විනය කමිටුව, විහිළු, ශ්‍රී ලංකා නිදහස් පක්ෂය, සාක්කි

Posted in: Uncategorized