ලංකාවට බුදුබණ ගෙනාවෙ අද වැනි පොසොන් පෝ දිනක ය. එසේ ගෙනෙන ලද බුදුබණ ලංකාව තුළ ඇති කළ වෙනස මහත් ය. එහෙත් කාලයත් සමග බුදු බණ තමන්ට අවශ්ය පරිදි නැවත සකස් කර ගැනීමට බලවත්තු සමත් වූහ. ඒ නිසාම අද ඇත්තේ පිරිසිදු බුදුදහම සිය ජීවිතය කරගත් දේශයක් නොවෙ. එය කොඩියක් කොට ලෙලවන දේශයකි.
මෙ තත්වය ගැන කම්පා වූ කෙනෙක් අදට වසර 75ට පොරොතුව ඊට එරෙහිව සිංහනාදයන් පැවැත්වූහ. ඒ බුදුදහම නැවත ප්රතිපෝෂණය කිරිමෙ අරමුණිනි.
ඒ ශ්රේෂ්ඨ ලාංකීය පුත්රයා මුනිදාස කුමාරතුංග ය.
අප එතුමා කලින් ද මෙහි උපුටා දක්වා තිබෙ. එහෙත් ඉවරයක් නැති දායකත්වයක් එතුමාගෙන් ලද හැකි නිසාම නැවතත් එතුමන්ව කැඳවන්නට සිතුවෙමු.
අප අපගේ බ්ලොග් අඩවියෙන් සටන් කළ දෑ වෙනුවෙන් මුනිදාස කුමාරතුංගයන් වසර 75ට පෙර පෙනී සිටිය හැටි දකින අපට එක්වර සතුටකුත් දුකකුත් ඇතිවෙයි.
සතුට අප දකින සේ ඒ හැටියටම වාගේ දුටු හෙළ විරුවන් ඉතිහාසයේ පවා සිටි නිසා ය.
දුක වසර 75ක් ගත වීත් ඒ සටනම කිරීමට අපට ද සිදුව තිබීම නිසා ය. දුක වඩාත් දැඩිව නැගෙන්නේ එදා එසේ කුමාරතුංගයන් සටන් වදින විට එතුමා දේශප්රේමීයෙකු ලෙස සළකා ජනතාව එතුමන්ට උඩගෙඩි දුන් අතර අද එම සටනම කරන අප දේශද්රෝහීන් ලෙස සළකා කටයුතු කරන යුගයක් එළැඹ තිබීම ය. අද අපගේ බ්ලොග් සටහන වෙන්වන්නේ තවත් එවැනි කුමාරතුංගයන් හා අප එක්ව දකින කාරණයක් ගැන ඔබට කියන්නට ය. කුමාරතුංගයන්ගේම වචන වලින් ඊට සවන් දුන මැනව.
“….බෞද්ධයෝ ස්ව සමයය හුවා දක්වන්නෝ බොහෝවිටැ අන්ය සමයයන් පමණට වඩා හෙළා දකිති. මේ වර්ථමාන බෞද්ධයින්ගේ මැ සිරිතක් නොවේ. පුරාතනයෝ ද පරවාදයන් මහත් විහිළු කොටැ දක්වන්නට හැකි පමණ වැර වැඩූහ. මහා වීරාදීන් ගැනැ බෞද්ධ ග්රන්ථයන්හි ලියැවුණු දෑ බලන කලැ මේ කීමේ සත්යතාවය මනා වැ වැටැහේ. අනුන්ගේ කුහක වෘත්ති එතරම් මහත් කොටැ දක්වන්නාවූ බෞද්ධයින්ගේ කුහක වෘත්තිය කෙබදු ද?
වාසියට වැටෙන තන්හිදී නජච්චා වසලො හොති යනු මහත් ආටොපය දක්වමින් කියන්නට මැළිවන්නෝ බෞද්ධයින් අතරැ නොලැබෙති. එහෙත් අප නිබන්ධ කාර ජයවර්ධනන් කියන්නාසේ හවුරුදු දෙදහසක් බුද්ධ ශාසනය පැවැතුණු පසු ද ලංකායෙහි රොඩී ගැහැනිය රොඩී ගැහැනිය මැ යැ. අනෙකක් තබා ඇයට සම්පූර්ණ වශයෙන් විළි වසාගැන්ම ද තහනම් යැ. ජයවර්ධනයන් උපහාස මුඛයෙන් කියන්නාසේ, ඇය අන් කවර පරිද්දෙකින් කමනීය වුව ද අපගේ ශ්රේෂ්ඨයන්ගේ ගැහැනුන් ඉන්නා තැනෙක පස් පෑගීමට ද ඕ සුදුසු නොවන්නී යැ. “අනේ, හාමුදුරුවනේ, මේ හිගා කන රොඩී ජාතියට හිගමනක් ලැබෙන්න” යනු දැන් කොළොඹැ වීථිවලැ ද ඇසේ. අතෙහි දොසෙක් නැති, පයෙහි දොසෙක් නැති, ඇසෙහි කනෙහි වරදෙක් නැති, ඇතුළතැ ලෙඩෙක් නැති, එසේ කලැ හැයි හිගන්නේ? හිග කන ජාතියේ උපන් හෙයිනි. හොද යැ, බුද්ධ ශාසනය නිර්මල වැ පවත්නා රටෙහි බුද්ධාවවාදය පිළිපදිනා සැටි? බුදුහු නජච්චා වසලෝහොති යැයි සත්යයක් මැ වදාළහු නම්, ඔවුනට මෙතරම් නින්දාවෙක් අබෞද්ධයින් අතිනිදු නොලැබේ.
නජච්චා වසලොහොති යන්න වැඩිවශයෙන් මැ බොරු බව හගවන්නෝ කවරහුද? බුදු බණ නොදන්නෝ නොමහණෝද? නොවෙති. බුදුබණ මැනවින් උගත්, ලෙවි සැප පියා පැවිදි වූ, අප නිවන් දක්කන්නට රෑ දෙවෙහි නොයෙක් වෙහෙස ගන්නා බුද්ධ පුත්රයෝ යැ. හින්නකුල වූ නොපැවිද්දෝ එක් වැ වසන්නට පොහොසත් වෙති, පැවිද්දෝ නොපොහොසත් වෙති. පැවිද්දන් අතරැ නිකාය භේදයෙකුදු වෙයි. එහෙත් කුල භේදයට ලක් කළ කලැ නිකාය භේදය නොපෙනෙන තරම් කුඩා වෙයි. කුල දෙකෙකින් එක මැ නිකායෙහි මහණ වූ දෙ දෙන කුල භේදය සලකා නිකාය භේදය මතක නැති කෙරෙති. බුදු රජුනි, බලා වදාළ මැනවි, ඔබගේ ශාසනය අද ලක් දිවැ කො තරම් පිරිසිදු වැ පවතී ද යනු. මෙබදු මහණුන් විසින් දක්වනු ලබන මාර්ගයෙකින් ගිය හැකි දෙව් ලොවෙක් බඹ ලොවෙක් නිවනෙක් වේ නම් සැබැවින් ඒ සියල්ල අතිභයංකර වියැ යුතු යැ….”
කුලය කල් ඉකුත්ව ගිය සාධකයක්ව තිබියදීත් මේ බුදුන්ගේ දේශයේ එය තවමත් හිස මත තබා ගෙන ඇවිදින බොහෝ ජනයා සිටින්නේ කෙසේ ද? බුදුන්ගේ දේශය සැබෑ ලෙස අවමානයට පත්කරන්නේ බිකිණි ඇදගත් කෙල්ලන් පිරිසක් බුදු පිළිමයක් ඉදිරියේ තබා ගෙන නටවනා ගායක ඒකොන් විසින් ද කුණුවලින් ඔලුව පුරවා ගෙනම බෞද්ධයින් යයි තමන්වම හදුන්වාගන්නා ජනයා විසින් ද?
බුදුන්ට වැඩි අවමනක් ලැබෙන්නේ බුදු බණට පිටු පෑමෙන් ද බුදු පිළිමයකට පිටු පෑමෙන් ද?
විමසන්නට අකමැත්තක් බියක් නැති, විමසන්නට හැකියාවක් ඇති, සෑම බෞද්ධයෙකුම නැගිය යුතු පැනය එය නොවෙද?
පොසොන් දිනය තරම් අපගේ (ලාංකික බෞද්ධයින්ගේ) ඇතුළාන්තය විමසිය යුතු දිනයක් තවත් නැත. මේ සටහන ඒ වෙනුවෙනි.
Hasitha
June 25, 2010
යථා තත්වය මැනවින් කුමරතුඟුවන් දක්වා ඇති බවක් පෙනේ……
පියරු බබා
June 25, 2010
Excellent points..
ඉන්දික උපශාන්ත
June 25, 2010
ඕක කුමාරතුංගගෙ කියල උපුටලම දාපු නිසා උඹ බේරුනා පුතේ!
හුරුල්ලා
June 25, 2010
“ඒ නිසාම අද ඇත්තේ පිරිසිදු බුදුදහම සිය ජීවිතය කරගත් දේශයක් නොවෙ.”
පිරිසිදු බුදුදහම යනු කුමක්ද? බුදුන් වහන්සේ විසින්ම වදාල වචනද? එසේ නම් ඒවා අසා සිට වාර්තා කලේ කවුද? සදා නොවෙනස් වන ලෙස සටහන් කලේ කවුද?
මෙම අදහස මිත්යාවකි. බුදු දහම යනු බුදුන් වහන්සේ ගෙන් ඇරඹි දර්ශණ සම්ප්රදායයි. දස දහස් ගණන් මහා සංඝයා වහන්සේලා විසින් තම තර්ක ඥාණය සහ සමාන්තර දර්ශණවාදයන්ගෙන් ලද දැනුම භාවිත කොට පෝෂණය කරන ලද්දකි.
එහෙයින් පිරිසිදු බුදුදහම නම් නිශ්චිත දැනුමක් කවර කලකදී වත් තිබිය නොහැකිය.
පිරිසිදු බුදුදහම යනු වර්තමාන සමාජ අර්බුදය දරාගැනීමේ නොහැකියාව විසින් මතුකරන අතීතකාමී අදහසකි.
කොලූ
June 25, 2010
මම හිතන්නේ මේ කාරනය “More Perfect” වචනයත් සමග සැසදේ. කිසිම දෙයක් පිවිතුරු, සර්වසම්පූර්ණ වන්නේ නැත්නම්, යමක් අද ඇත්තේ කෙසේද, ඒය පිවිතුරු සහ සර්වස්ම්පූර්ණය. නමුත්, ඊට වඩා සර්වසම්පූර්ණ විය හැකි බව අපේ මනස දනී. ඒ නිසා, “තවත් සර්වසම්පූරුණ” කිරීම සදහා අපි වෙර දැරිය යුතුය. පිරිසිදු බුද්දාගමත් එලෙසමය. එය ගමනාත්තයක් නොවෙයී, ගමනකි.
බෞද්ධ සමාජයේ කාන්තාවට ඇති (නො)සැලකීම පිලිබද මාටින් වික්රමසිංහත් බොහොම ලියලා තියෙනවා. ඒ දවස් වල දේශප්රේමියෝ උන්දෑව මරාගෙන නොකෑටික විතරයී.
beyondframe
June 25, 2010
බුදු දහමේ මේ යුගයට වුව ගැලපෙන බොහෝ දේ තිබේ. බුදුන්ගේ චරිතය තුළ ද විශේෂයෙන් එවක සමාජ සන්දර්භය සැළකූ විට ගත හැකි මා හැගි ආදර්ශයන් තිබේ. මා බුදුදහම අගයන්නේ ඒ ඉගැන්වීම් වෙනුවෙනි. පිරිසිදු යයි මා දකින්නේ ඒ කාලය විසින් අවලංගු නොකරන ලද බුදු දහම ය. ඒ නිසා එය අතීතකාමී නොවේ.
බුදු බණම කෙළෙසන වතාවත් රාශියක් පසු කලෙක එක් වී ඇතැයි සිතෙන්නේ ඒවා බුදුන්ගේ මූලික ඉගැන්වීම් වලට විරුද්ධව යන හෙයිනි.
බුදුන් දෙසූයේ මේ යැයි පිරිසද දත නොහැකි ය. අපට එසේ බුද්ධ භාෂිතය සොයා එය දේව වාක්යයක් මෙන් අදහන්නට අදහසක් හෝ වුවමනාවක් ද නැත.
බුදුන් දෙසූ කාරණා යයි ප්රකට සියල්ල අතර අද දවසට ගැලපෙන සියල්ල පිරිසිදු බුදු දහම යයි අපි අර්ථ ගන්වන්නෙමු. එවිට අතීත කාමී නොවී මා හැගි දර්ශනයකින් ජීවිතයට එලියක් ලද හැකි ය.
yasela
June 25, 2010
well said . you have rightly pointed out one of our major problem.
7 Mahinda nade
June 26, 2010
පොල්හේන්ගොඩයා
June 26, 2010
බෞද්ධයෙකු(යැයි කියා ගන්නා කෙනෙකු) ගේ කුහක වෘත්තිය:
සංඝයා වහන්සේ ඉටු කරන අනූපම සේවාව ගැන වචනකිනිඳු හොඳක් නොදකින, එහෙත් උන් වහන්සේලාගේ අතින් සිදු වන සුළු වැරැදි උලුප්පා දක්වා කෙන්ද කන්ද කරමින් තළු මර මර භුක්ති විඳින, බිස්නස් නැති දා ට සංඝයා වහන්සේ නමක් ‘මවා’ ත්රී වීලයක් ඇතුලුට දමා නැති කෙන්ද කන්දක් කරන, ඇත්ත ඇති සැටියෙන් නොදැකින, දෛනික බ්ලොග් ලිවීමේ වෘත්තිය.
beyondframe
June 26, 2010
මුනිදාස කුමාරතුංගත් අයිති වෙන්නෙ ඒ ගනයටම ද දන්නෙ නැහැ. පුංචි පැහැදිලි කිරීමක් කළොත් මොකද?
ගෙවිදු කුමාරතුංග මුණුබුරාගෙන්ම අහලම කිව්ව වුනත් කමක් නැහැ. එතුමා දේශප්රේමීයෙක් නිසා.
පොල්හේන්ගොඩයා
June 26, 2010
සාතන් තමාට අවශ්ය දෙය ඔප්පු කිරීමට බයිබලයෙන් ද පාඨ උපුටා දක්වයි.
එනමුදු සාතන් හා දෙවියන් වහන්සේ එක ගොඩේ ලා සැලකන්නේ කවුරුන්ද?
පොල්හේන්ගොඩයා
June 26, 2010
එක පසෙක, සිංහළ බසට අනූපමය සේවාවක් ඉටු කළ, ලක්මිණි පහන හා සුබස සංකරණය කළ, සිංහළ ව්යාකරණය ගැන ද ඇතුළුව පොත් 32ක් පළ කළ, හෙල හවුලේ නිර්මාතෘ මුණිදාස කුමාරතුංග ය.
අනෙක් පසින්, සිවුරු වල කුණු ඇතිදැයි ඉව අල්ලමින් දිනපතා කෑලෑ පත්තරයක් පළ කරනා බියොන්ඩ්ෆ්රේම් ය.
විභූති වැනි ගොන් බඳිනා කනු හැරෙන්නට, කුමරතුඟුවන්ගේ වැකියක් දෙකක් තමංගේ කෑලෑ පත්තරයේ පළ කළ නියාවෙන් කෑලෑ පත්තරයත් ‘ලක්මිණි පහනක්’ වේ යැයි රැවටෙන්නෙ වෙන කවරෙක් ද? කෑලෑ පත්තරකරුවා, කුමරතුඟුවන් ගේ ගොඩට වැටේ යයි සිතා රැවටෙන්නෙ වෙන කවරෙක් ද?
beyondframe
June 27, 2010
මුනිදාස කුමාරතුංගයන්ගේ තව බොහෝ කියුම් කෙරුම් අප සතු ය. අප මෙන් නොව මුග්ධයින්ට පහර දීමෙදී කිසිදු අනුකම්පාවක් එතුමා දක්වා නැත.
ඉදිරියේදී අප ඒවා තව තවත් ගෙන ඒමට අපේක්ෂා කරන්නෙමු.
එතකොට සිවුරට ඉව අල්ලා නොනැවතී අවශ්ය තැන එය ගලවන්නට ද ඉදිරිපත් වූ හෙල විරුවෙකි ඔබට දැක ගත හැකි වනු ඇත.
පුලුවන් නම් ගෙවිඳුට කියා කුමාරතුංගගේ පැරණි ලියකියවිලි පුළුස්සා දමන්නට කියන්නය එයින් ද මෙ මුග්ධයින්ට ගැලවීමක් නොලැබෙනු ඇත්තේ ය. මක්නිසාද යත් ඒ සියල්ල දැන් අප සතුව ද ඇති බැවිනි.
vibuthi
June 26, 2010
තමන්ගේ ඇහේ තියන පොල්පරාලය නොපෙනෙන උන් අනුගේ පොල් කෙන්ද ගැන සොයයි
අනුගේ පොල් කෙන්ද ගැන් කිව්වද ඉන් තමන්ට ගත හැකි පාඩම් නොගෙන හුරේ දමයි
බලන කොට ආලවක, අන්ගුලිමාල පමනක් නොව අවසානයේදී දෙව්දත්ද මුන්ට වඩා ඉදිරියෙනි
මුන්ට බුදුහාමුදුරුවෝ බන කිව්වත් කියාවි ඇයි මට බන කියන්නේ කියනවකෝ බන අරූට කියලා
පොල්හේන්ගොඩයා
June 26, 2010
සහතික ඇත්ත ආයුබොවන්ඩ.
තමං ගෙ ඇහේ තියන පොල් පරාල නෙවෙයි මුන්දැලට පේන්නෙ, කොහෙවත් පත්තරේක අග්ගිස්සෙ කොනක අඩු ගානෙ සතියක් වත් බොරුවෙන් වැලකෙන්නය කියලා හාමුදුරු නමක් කියන එකේ වැරැද්ද නෙ ආයුබොවන්ඩ මුන්දැලට පේන්නෙ.
එච්චර මහන්සි වෙලා දවස ගානෙම හාමුදුරු වරුන්ගෙ වැරැදි අඩු පාඩු හොය හොයා උලුප්පන්නෙ බෞද්ධාගමට තියන ලැදියාව නිසා මිසක් කුහක වෘත්තිය නිසා නෙවෙයි ලු නෙ ආයුබොවන්ඩ.
බලන්නකො ඒකෙත් හැටි ආයුබොවන්ඩ.
vibuthi
June 26, 2010
මම ඉහත කී කරුනු වලට අමතරව වයිඩ් පන්දු වලට පිත්ත දැමීමද මොවුන්ගේ සිරිතකි
ඒ අතින් මොවුන් අපේ රන්ග වීරක්කොඩි අය්යාට සමානවේ
Pukkusathi
June 28, 2010
කුමාරතුංග මුනිදාස මහත්තයව උපුටා දැක්වුවට මොකෝ කට්ටිය වෘත්තියයි ව්රතයයි පටළවගෙන වගෙයි පේන්නෙ. මේක අර චූලවංශෙට කුළවංශෙ කියපු එකේ දෙවනි කොටස වෙන්න ඕනෙ. එළ…ඔහොම යං!!!
– පුක්කුසාතී.
beyondframe
June 28, 2010
වැරදුනා නම් වරදින්න ඇත්තෙ අපට නොවෙ. ලක්මිණි පහන කතුවැකි නැවත මුද්රණය කළ ගෙවිඳු කුමාරතුංගට.
Pukkusathi
June 29, 2010
යමක හරය තේරුම් නොගෙන පිට පොත්ත කොපි කරන්න යනකොට ඔහොම දේවල් වෙනව.
beyondframe
June 29, 2010
මං ගෙවිඳු කුමාරතුංග මහත්තයට ඔය ටික කිව්ව. ඇහැව්වෙ නැහැනෙ.
Pukkusathi
June 29, 2010
ඊට පස්සෙ ගෙවිඳු මහත්තය කින්ඩියට වගේ හිනහත් උනාද? සමහරවිට ඔහේගෙ මූණ දැක්කහම කාට උනත් ඔහේ බයිට් එකක් කියල තේරෙනව ඇති. වෙනින් කෙනෙක් දම්මල කියවල බලන්න. එතකොට ඇතැම්විට එතුම පහදල දෙයි යමක් සංරක්ෂණය කිරීමේ මූලධර්ම.