අමිතාබ් – හූ.. හූ… ඇද්ද උඹලට!

Posted on June 21, 2010



අමිතාබ් බච්චන් කැත මිනිසෙකි. ඓශ්චර්යා රායි ද සවුත්තු නිලියකි. එහෙම නැත්නම් අයිෆා සම්මාන උළෙලට නෑවිත් අපේ රටට මෙහෙම අපකීර්තියක් ගෙනෙන්නේ නැත.

මේ කාලා ඉන්න බැරි වැඩය කළ දෙපළට පාඩමක් උගන්නන්ට ඕනෑය. ඇත්තටම රටට හිත ඇති දේශපේ‍්‍රමීන් වැඩට බැස්සේ ඒ අනුව ය. මේ දෙන්නා රගපාන රාවන් පෙන්නන්නට ලක ලෑස්ති කර තිබුනු අවස්ථාව ඒ සඳහා බොහෝ හොඳින් ගැලපුනේ ය.

කට්ටිය වැඩට බැස්සෝය..

ඒ අනුව සැමරුම් දිනය දා සිට මේ මස 30 දා දක්වා රාවන් නැගෙනහිර පළාතේ පෙන්වන්නට බැරි යැයි තහනම් නියෝගයක් පනවා තිබේ. ඒ බෙදාහරින ලද පත්‍රිකාවකිනි. පුංචි ආණ්ඩුවක් නැවත ක්‍රියාත්මක වෙන බවක් පෙනෙයි. එහෙත් කලින් වාරයේ මෙන් නොව මෙවර එය ක‍්‍රියාත්මක වන්නේ මහ ආණ්ඩුවේ ආශිර්වාදය මැද ඒ වෙනුවෙන් ය.

අමිතාබ් බච්චන්ට හා ‍‍ඓශ්වර්යා රායිට වෙඩි තියන්නට බැරි නිසා ඒ දෙන්නා ඉන්නා කටවුට් එකකට ද මේ පිරිස වෙඩි තියා ඇත.

දැන් ඉතින් පණට ආසා එකෙක් 30 දා තෙක් මේ සිනමාහල පළාතේ නම් එන්නේ නැත. සිනමා හළේ නම් ශාන්තී ය. ඒත් ඒ නම කවරෙකු හෝ 30 දාට පෙර ගෙන්වන්නට නම් දැන් ඉතින් සමත් වෙන එකක් නැත.

දැන් ඉතින් අපකීර්තිය ඉවරය (ඇති යාන්තම්!).

මතක තියෙන කාලයක අමිතාබ් නම් ලංකාවට නෑවිත් ඉන්න එකක් නැත. ඓශ්වර්යා වුනත් ‍මෙහේ ඓශ්චර්ය පහළ වෙනතුරු බලා නොසිට එන්නට සිත හදා ගන්නවා ඇත.

හූ හූ ඇද්ද උඹලට!

(තෝ හූ කිව්වෙ කාට ද?)

Posted in: Uncategorized