ආගම දං ගෙඩියක් වී ජාතිය බහු රූ කෝලමක් වෙයි!

Posted on April 2, 2010



ඕල්කට් තුමා ඇමරිකානු ජාතිකයෙකි. එතුමා බුද්ධාගම ගැන පැහැදී බුදුදහම වැළදගෙන අපේ ර‍ටට ද පැමිණ බුද්ධාගමේ උන්නතිය වෙනුවෙන් යම් කාර්යයක් කළ උත්ත‍මයෙකි.

අජාන් බ්‍රහ්මවංස හිමියන් සුද්දෙකි. බුදු දහම වැළදගෙන ඕස්ට්‍රේලියාවේ පමණක් නොව ලොව පුරා එය පැතිරවීමට කටයුතු කරන සග රුවනකි. එතුමාගේ ධර්ම දේශනා විශාල ප්‍රමාණයක් සිංහල බසෙන් මුද්‍රණය වී තිබේ.

මේ දෙපල පමණක් නොව තවත් මෙසේ බුදුදහම වැළදගෙන එහි ව්‍යාප්තිය හා උන්නතිය වෙනුවෙන් කටයුතු කරන බටහිර හා වෙනත් ජාතිකයින් බොහෝ ය. ඒ අය එසේ කිරීම ඒ රටවල ආණ්ඩුවලටවත් පොලීසියටවත් ප්‍රශ්නයක් නොවී ය. අපට ද එය ප්‍රශ්නයක් නොවූවා සේම බො‍හෝසෙයින් ආශ්ලාදජනක ප්‍රවෘත්තියක් ද විය.

එහෙත් බෞද්ධ කාන්තාවක් වූ සරා මාලීනී පෙරේ‍රා බුදුදහම අත්හැර මුස්ලිම් ආගම වැළදගෙන අදුරෙන් එලියට නමින් පොතක් ලිවීම අපට හරි ගියේ නැත. ඒ පොතේ පිටපත් සමූහයක් බහරේන් යවන්නට බාර දුන් ආයතනය විසින් සරා මාලීනී පොලිසියට බාර දී ඇති අතර දැන් මාසයක් මුළුල්ලේ ඇය සිරකර තබා ඇත.

ඒ රටවල මිනිසුන් අදුරෙන් එලියට එන විට අපි එලියෙන් අදුරට යන බවක් මට දැනේ. ඒ ප්‍රකාශය කළේ සරා මාලීනි සම්බන්ධයෙන් නොවේ. සරා මාලීනිය හිර බාරයට ගැනීමටත් ඉන්පසු රදවා ගැනීමටත් කටයුතු කළ ආයතන පද්ධතිය ආශ්‍රිතව වෙසෙන මිනිසුන් සම්බන්ධයෙනි.

ධර්ම ප්‍රචාරය සදහා බුදුදහම වැළද ගන්නා වෙන රටවල මිනිසුන්ට ඇති අයිතිය වෙනත් ආගමක් වැළද ගන්නා ලංකාවේ මිනිසුන්ට නැති විය හැක්කේ කෙසේ ද?

මේවා පැහැදිලි කළ හැක්කේ දේශප්‍රේමීන්ටම පමණි. දේශප්‍රේමය තක්කඩියෙකුගේ අවසාන රැකවරණය යන කියමන නිතර නිතර මතක් කිරීමට වල්පොල රාහුල හිමියන්ට සිදුවුනේ එහිමියන්ගේ බුද්ධියට මේ අමන කෝලම් බලා සිටීමට නොහැකි වූ නිසා ද?

Posted in: Uncategorized