බෑණාට සැළකීම හා තම බිරිදට සැළකීම අතර ඇති මහා වෙනස

රෝහණ දිසානායක කැබිනට් නොවන ඇමතිවරයෙකි. ඔහුගේ බිරිද ඉංග්‍රිසි ගුරුවරියකි.

එහෙත් ඇය දුප්පත් ය (රට කෙතරම් ආගාධයට ගොස් ඇති ද යන්න එයින් අදහස් වෙතැයි කිසිවෙකුත් සිතිය යුතු නැත). ඒ නිසා ඇය බත්තරමුල්ලෙන් පර්චස් 15 ක් ඉල්ලා සිටියා ය.

අපේ රටේ රාජ්‍ය නිලධාරීන්ගේ හදවත් ඉක්මණින් උණුවන සුළු ය. ඒ නිසා ම නාගරික සංව‍ර්ධන අධිකාරියේ කාර්යක්ෂම නිලධාරීන් විසින් රෙකමදාරුවක් ද සහිතව අමාත්‍යංශයේ ලේකම්ගේ අනුමැතිය පතා එම ඉල්ලීම ඉක්මණින්ම ඉදිරිපත් කර තිබිණි.

ඉතා ඉක්මණින් ඇගේ ඉල්ලීම ඉටු කරනු පිණිස කැබිනට් පත්‍රිකාවක් ද ඒ සමගම සකස් කර ඉදිරිපත් කරනු ලැබිණි. ඒ කැබිනට් පත්‍රිකාව ඉදිරිපත් කරන්නට ඇත්තේ පාර්ලිමේන්තුවේ ආණ්ඩුවේ සංවිධායක වූ ද පැරණි වාමාංශිකයෙකු වූ ද අතිශයින්ම දේශප්‍රේමියෙකු වූ ද දිනේෂ් ගුණවර්ධන ඇමතිතුමා විසින් විය යුතු ය. ටයිම්ස් පුවත්පතේ පළවු ප්‍රවෘත්තියට අනුව දැනටමත් ඉඩම ලබා දී ඇති නිසා එය ඇමතිතුමා විසින් ඉදිරිපත් කරන්නට ඇති අතර එය කැබිනට් මණ්ඩලය විසින් අනුමත කරන්නට ද ඇති බව අනුමාන කරන්නට සිදුවේ.

තමන්ගේ ආමාත්‍යංශයටම අයිති කැබිනට් නොවන ඇමතිවරයාගේ බිරිද දුප්පත් වීම කැබිනට් ඇමතිවරයාට පවා දරා ගන්නට පුලුවන් නුවූවා වෙන්නට පුලුවන. ඒ නිසා එතුමා අනුමත කළා ද නැත්නම් ඇමතිතුමාටත් නිලධාරීන් හා තම දේශපාලන සගයා විසින් ලණු දුන්නා දැයි හරිහැටි පැහැදිලි නැත. ඊට හේතුව මෙම ඉල්ලුම ඉදිරිපත් කර ඇත්තේ එම ඇමති බිරිදගේ විවාහයට පෙර නමින් එතුමියගේ මෑණියන්ගේ ලිපිනය යොදා සකසන ලද ලිපියක් මගින් නිසා ය.

දුප්පත් කෙනෙකුට කරන ලද මේ අනුග්‍රහය නිසා, පිංකමක් වත් තේරුම් ගන්නට අසමත් මේ පොළොවේ පය ගසා නොසිටින අය විසින්, මෙයට සම්මාදම් වූ බොහෝ අය හෙට වන විට අත්අඩංගුවට ගනිතැයි බියක් අපට තිබේ. මේ නිසාම රෝහණ දිසානායකගේ පමණක් නොව දිනේෂ් ගුණවර්ධන ඇමතිවරයාගේ ද දේශපාලන අනාගතය අදුරු වනු ඇතැයි ද පුදුම දුකක් අපට ඇතිවේ.

හරි හමන් සාක්කිත් නැතිව දේශප්‍රේමීන් අත්අඩංගුවට ගන්නා කුමන්ත්‍රණයක් බටහිර තානාපති කාර්යාලවල අනුග්‍රහයෙන් සිදුවන මේ කාලයේ මේ දේශප්‍රේමීන් දෙන්නා හරි හමන් චෝදනා ද නැතිව අත්අඩංගුවට ගැනීමේ ඉඩ අපට කිසිසේත් බැහැර කළ නොහැකි ය.

ඇතිව තිබෙන දුක අපට වාවන්නේ නැති වුවද මේ ගැන අපට කළ හැක්කක් නැත. ඒ අප මියන්මාරය බලා යාත්‍රා කරමින් තිබෙන නිසා ය.

රට රකින දෙවිවරුන්ගේ සරණ රෝහණ දිසානායක ඇමතිතුමාටත් එතුමාගේ දුප්පත් බිරියටත් මේ පිංකමට දායක වූ රාජ්‍ය නිලධාරීන්ටත් කැබිනට් පත්‍රය නිර්භිතව ඉදිරිපත් කළ දිනේෂ් නැමැති දේශමාමක ඇමති තුමාටත් මෙයට අනුමැතිය දුන් සංවේදී ඇමති මණ්ඩලයටත් ලැබී අල්ලස් හා දූෂණ කොමිසම මේ සියලු දෙනා මෙයින් නිදහස් කර දෙන්නැයි අපි උදක්ම පතමු.

බෑණන්ට සැළකීමට සහ තම බිරිදට හෝ තම සගයෙකුට සැළකීම අතර ඇත්තේ අහස පොළොව මෙන් විශාල වෙනසක් බව ඇත්තටම රට වැසියන් විසින් අවබෝධ කරගනු ඇතැයි ද නැත්නම් පංචායුද හෝ පාවිච්චි කර ආණ්ඩුව විසින් අවබෝධ කර දෙනු ඇතැයි ද අපි ඒ සමගම බලාපොරොත්තු වෙමු.

රෝහණ දිසානායක ඇමතිතුමාටත් එතුමාගේ බිරිදටත් එතුමාගේ කැබිනට් අමාත්‍යවරයාටත් එතුමන් සතු කාර්යක්ෂම නිලධාරී මඩුල්ලටත් සුභ අනාගතයක්!

දුප්පතුන්ට දැන් ඉතින් ආණ්ඩුවේ ඉඩම්වලම පිහිටයි!

Advertisements

Posted in: Uncategorized