විධායක ජනාධිපති ක‍්‍රමය තිබුණහම ….. අපට කෙළවෙන්නේ කොහොම ද?

Posted on December 23, 2009



විධායක ජනාධිපති ක‍්‍රමය තිබුණහම මක්ක වෙනවද? අපට තියෙන ලොකුම ප‍්‍රශ්නෙ ඔක ද? බඩගින්නේ ඉන්න, රස්සා නැතිකමෙන් පීඩා විඳින, ආර්ථිකය බිඳ වැටීමෙන් නන්නාත්තාර වෙලා ඉන්න මිනිසුන්ට ඔන කරන්නෙ ඔක ද?

මෙ වගේ ප‍්‍රශ්න ගොඩක් මිත‍්‍රයෙක් අහපි.

අපට ඇත්තටම තියෙන ප‍්‍රශ්නයත් මෙවා අතර සම්බන්ධයක් ඇති බව නොදැනීම ය.

ආර්ථිකය බිඳවැටී ඇත්තේ දූෂණය රජ වී ඇති නිසා ය. ඊට හේතුව නීතියේ ආධිපත්‍ය බිඳවැටීමත් අල්ලස් හා දූෂණ කොමිසමෙ ද පොලිසියේද බලය බිඳ දමා තිබීමත් ය.

ආර්ථිකය බිඳ වැටීමට අනිත් හේතුව තමන්ගේ හිතවතුන්ට දීම සඳහා තේරුමක් නැති රස්සා ඇති කිරීම ය. ඊට ඇමති තනතුරු වගේම රජයේ වෙනත් තනතුරුද අදාළ ය. මෙසේ වන්නේ පාර්ලිමෙන්තුවට වග නොකියන ජනාධිපති කෙනෙකු සිටීමත් ස්වාධීන රාජ්‍ය සේවා කොමිසමක් ඇතිකිරීම ජනාධිපති මුක්තිය භාවිතා කරමින් දිගින් දිගට පැහැර හැරීමත් නිසා ය.

ආර්ථිකය බිඳ වැටී ඇති අනෙත් හේතුව ඉහවහා ගිය නාස්තියයි. මෙ නාස්තියේ උල්පත, කරන වැරදිවලට උසාවි ගෙන ගිය නොහැකි විධායක ජනපති පදවියයි. දන්සැල් දෙන්නේත් රජයේ ආයතන ලවා දැන්වීම් පළකරවා තමන්ගේ ප‍්‍රතිරූපය මැතිවරණයක් අභියස පුම්බවා ගන්නේත් ඒ පදවියට ඇති මුක්තියේ අනුහස යොදා ගෙන ය.

හෙජින් ගිවිසුමට එරෙහිව දෙන ලද ශ්‍රේෂ්ඨාධිකරණ තීන්දුව හිතුමනාපයට පැහැර හැරිය විටදී වත් ඊට එරෙහිව යමක් කිරීමට නොහැකි වූයේ මුදල් ඇමතිවරයා ජනාධිපතිවරයා වීමත් ජනාධිපතිවරයාට විරුද්ධව නීතිය  ක‍්‍රියාත්මක කළ නොහැකිවීමත් නිසා ය.

ඒ නිසා මිනිසුන්ගේ බඩ ගින්නත් අගහිගයනුත් රටෙ ආර්ථික අර්බුදයත් සමග විධායක ජනපති ධුරයට ඇත්තේ ඍජු සම්බන්ධයකි.

අපගේ අභාග්‍ය මෙ ටික තේරුම් ගැනීමට අප අසමත් වීම ය. අප හිතන්නේ බඩගින්නට හේතුව බඩුමිල කියා ය.

බඩු මිලට හේතුව ඒ හේතුවට හේතුව වශයෙන් විමසා ගෙන යන විට අවසානයට ඇත්තේ ජනාධිපති පදවිය බව පෙනේ. එහෙත් එතරම් දුරට විමසන්නට අප කම්මැලිය. අපගේ මිතුරා අපෙන් ඒ ප‍්‍රශ්නය ඇසුවෙ ඒ නිසා ය.

ආණ්ඩුවට ජනතාව රවටන්නට පුලුවන් කම ඇත්තේ මෙ නොදැනීම නිසා ය. ආණ්ඩුව බලයේ සිටින්නේ මෙ නොදැනුමට පින්සිදු වන්නට ය.

ඒ නිසා අපි මෙසේ කියමු. විධායක ජනාධිපති ක‍්‍රමය තිබුනහම අපට බඩ ගින්නේ ඉන්නට සිද්ධ වෙනවා ය. එය අහෝසි කළ යුත්තේ ඒ නිසා ය.

Posted in: Uncategorized