මෙන්න ප‍්‍රවෘත්ති

Posted on October 6, 2009



මොනරාගල බෝ අත්තක් කඩා වැටී මිනිසුන් මැරුණේ නැත. හුස්ම නතර  වී ගියා පමණකි.

දෙනියායේ මාලිගාවක් ඉදිකර නැත. ඉදිකර ඇත්තේ කුඩා ගෙයකි.

ඒ පුංචි ගෙට යාමට සමහරු කියන පරිදි රන් අතුළ මාවතක් ඉදිකර නැත. රජයේ මග නැගුම ව්‍යාපාරය යටතේ ‘නිවසටම පාරක්’ යන මහින්ද චින්තන සංකල්පය යටතේ කරනා ජනතා සත්කාරයක් ඉටු කර තිබෙනවා පමණකි.

මග නැගුම සභාපති සුඛෝපභෝගී හෝටලයක කාමරයක් කුලියට ගෙන කාමර කුලිය ලෙස ලක්ෂ දෙකක මුදලක් මහජන සල්ලිවලින් දිනකට නාස්ති කරන්නේ යයි කියන්නේ කරුණු සොයා නොබලා ය. එතුමා සිය නවාතැන් ගාස්තු සදහා වැය වන නිශ්චිත පිරිවැයක් භාණ්ඩාගාරයෙන් නීත්‍යානූකූලව පරිපූරණ කරනවා පමණි.

ඌව පළාත් සභා මැතිවරණයේදී එකතු කළ මහජන දුක්ගැනවිලි කුණුගොඩක තිබී සම්භ වූයේ නැත. දුක්ගැනවිලි ගොඩ ලග කවුද කුණු දමා ගොස් තිබුනේ ය.

නිශාන්ත මුතුහෙට්ටිගම මහතා අනර්කලී නගා ට හෝ සජීන් ද වාස් මස්සිනාට නරක කිසිවක් කීවෙ නැත. කීවෙ හාද්දක් දෙන්නට කැමැත්තෙන් සිටින බව පමණකි.

ජවිපෙ මැතිවරණ කාර්යාලයන්ට කවුරුන්වත් පහර දී නැත. ඒවා පහුගිය දවස්වල හමාගිය සුලගට ඉදිරී වැටී ඇත. ඕනෑවට වඩා ලොකු බැනර් කටවුට් ගහගත්තහම සුළගට වුවත් රුස්සන්නේ නැත.

මත්පැන් දැන් අලෙවි වෙනවාය කියන්නේ පදනමක් නැති කතාවකි. මතට තිත තියා ඉවර ය.

කුරුණෑගලදී වෑන්රථයක බෝම්බයක් පිපිරී නැත. වෑන් රථයේ පිපිරීමක් නම් සිදුව තිබෙ.

රංග බණ්ඩාරගේ නිවස හා කාර්යාලය පුච්චා නැත. එය ඔක්සිකරණය වී තිබේ. එහිම ප්‍රථිඵලයක් ලෙස කාබන්ඩයොක්සයිඩ් පිටවී ඇත.

දකුණේ දන්සැල් දෙනවා ය කියන්නේ බොරුවකි. එහි ඇත්තේ සල්පිල් හා මගුල් මඩු ය. ඒවා තුළ සිදුකරන්නේ අල්ලස් දීම නොවේ. ආගන්තුක සත්කාර ය.

ජීඇස්පී නොදෙනවා ය කියන්නේ බොරුවකි. එය දෙන්න ලෑස්ති කරලා තියෙනවා ය. දෙන එක දෙන්නේ නැතිව උන් කොමල පානවා පමණකි.

වන්නියේ ජනයා හිර කර රදවා තබා ගෙන නැත. උන් අවතැන්වී ඇති නිසා කැමැත්තෙන් එහි පසුවෙති. කම්බි ගසා මුරකාවල් දමා ඇත්තේ කොටින්ගෙන් එල්ලවිය හැකි හදිසි ආක‍්‍රමණයකින් උන් ආරක්ෂා කර ගැනීමට ය.

බඩුමිල ඉහළ ගොස් නැත. සංශෝධනය වූවා පමණි.

රැකියා හිගයක් නැත. ඇත්තේ ඇබෑර්තුවල අඩුවක් පමණි.

ඥාතී හිතමිත්‍රාදීන්ට ආණ්ඩුව සළකනවාය කියන්නේ බොරුවකි. විශ්වාසවන්ත දැනමත් පරීක්ෂා කර බලා සුදුසු යයි සැක හැර දැනගත් පිරිස්වලට තනතුරු ලබා දෙනවා පමණකි.

(ඉහත අභ්‍යාසය හෙට අනිද්දා රූපවාහිනි ප‍්‍රවෘත්ති මැදිරියට යාම සදහා ඉල්ලුම්පත් ඒවා ඇති අයගේ ප‍්‍රයෝජනය පිණිස මහින්ද අබේසුන්දර හා හඩ්සන් සමරසිංහ එක්ව පැවැත්වූ ටියුෂන් පන්තියකින් සොයා ගන්නා ලදී)

Posted in: Uncategorized