අදුනාගැනීමේ පහසුව සදහා රජ ආයිත්තම් අන්දමු

Posted on September 25, 2009



ඒකනායක ඇමතිවරයාගේ පුතාට පුස්පාට් දාන්නට ඉදිරිපත් වුනු පොලිස් කොස්තාපල් කෙනෙක් අනුරාධපුර මහ ඉස්පිරිතාලයේ ය. ඒ අඩුපාඩුවක් නැතිව සංග්‍රහ විදීමෙන් පසු ය.

පොලිස් රාළහාමිලා හැමෝටම දාන ජාතියක් ඇමතිවරයා පුතාට දාන්න ගියා දැයි අපි නොදනිමු.

එහෙම වෙලාවක වුවද ඒ සදහා ගත හැකි නීත්‍යානුකූල ප්‍රතිපාදන කොතෙකුත් තිබේ. වඩා සුදුසු විදිහ වන්නට තිබුනේ පුද්ගලයා ගැන ඉහළට පැමිණිල්ලක් දැමීම ය.

පොලීසිය උසා‍වියේ රාජකාරිය බාර ගන්නා ගාණටම ඇමති පුතා පොලිස්පති අධිකරණය ඇතුළු රට කරවන සමස්ථ යන්ත්‍රණයේම රාජකාරිය තමන් විසින් බාර ගෙන තිබේ. ඇත්තටම පැරණි රජදවස වුවද කටයුතු සිදුවුනේ එහෙම ය.

අප මේ කරන්න යන්නේ පුංචි යෝජනාවකි. ඒ රාජකාරිය ඉටුකරන අවංක යහපත් පොලිස් නිලධාරීන් අතලොස්සගේ ප්‍රයෝජනය සදහා ය. මේ රජ දවස බව අවබෝධ කරගන්නට තවමත් නොහැකිව ඉන්නා පොලිස් බබාලාට ද සෙසු බබාලාට ද ප්‍රයෝජනවත් වන යෝජනාවකි.

අදුනාගැනීමේ පහසුව සදහා මෙවැනි බලය සහිත ඇමතිවරුන්ට ඇමති දරුවන්ට කිසියම් රජ ඇදුමක් පෙර රජ දවස මෙන් ඇන්දුවොත් මොක ද? උන්ට විරුද්ධව නීතිය ක්‍රියාත්මක කිරීමට යන නිලධාරීන්ට තමන්ගේ රාජකාරිය කිරීමට පෙර දෙවරක් සිතීමට ඉන් අනුබල ලැබෙනවා ඇත.

ඇත්තටම දැනටත් උන්දැලාට අඩු එපමණ ය.

මේ රට හදනවාට වඩා, කරන්න බැරි දේ කරන්න යනවාට වඩා, ඇමතිවරුන්ට හා උන්ගේ පුතුන්ට අච්චු කරන්නැයි ඉල්ලනවාට වඩා, අපේ ආරක්ෂාව අපි බලාගන්නට එක පහසු ය. ඉබ්බන්ගෙන් පිහාටු ඉල්ලනවා වගේ මෝඩ වැඩ කිරීමේ තේරුමක් නැත.

හදිසියේ අපට වුනත් යන එන විට මුණ ගැහුනොත් කාණුවකට බැස හෝ මේ ලොකු මහත්තැන්ලාට ඉඩ දෙන්නට එවිට පුලුවන් වෙනවා ඇත. ඉස්පිරිතාලෙ ලගිනවාට වඩා කාණුවකට බහින එක කොහොමටත් ඇගට සනීප ය.

Advertisements
Posted in: Uncategorized