වැඩේ දුර දිග යන පාටය! ගුරුවරුන්ටත් ජංගම දුරකථන එපා!

Posted on July 31, 2009



පාසල් ශිෂ්‍යයින්ට දමන ලද ජංගම දුර කථන තහංචිය තවත් ඉදිරියට ගෙන ගොස් ගුරුවරුන් ද ජංගම දුරකථන භාවිතයෙන් වැළකෙනු ඇතැයි ප්‍රකාශ කළේ පුංචි කෙනෙකු නොවේ. අපේ ඔටුනු නොපලන් රජතුමා ය.

ඒ නම් මේ රෝගය තව දුරටත් උත්සන්න වන ලකුණු ය. ගුරුන් ලගට එන‍්නේ දෙගුරුන් ය.

ඔවුන්ට ද මේ යෝජනාව නොබෝ දිනකින් එන්නට පුලුවන. මේ තීරණයේ සොමිය එපමණටම ඉහ වහා ගිය එකක් බව පෙනෙන්නට තිබේ.

ඇත්තටම වැඩිහිටියන්ට පමණයි චිත්‍රපට තහනම් කළේ ළමයිනුත් ඒවා බලන නිසා ය. ගෙදර ජංගම දුරකථනයක් තිබුනොත් දෙමාපියන් අහක බලන වෙලාවක දරුවන් ඕක නොබලා ඉන්න එකක් නැත. දෙමාපියන්ට හොරෙන් ගොස් පෝලිමේ ඉද මුදල් ගෙවා බැලිය යුතු ‘වැඩිහිටියන්ට පමණයි’ චිත්‍රපටිත්  බලනවා නම් ගෙදර නිකම් තියෙන ජංගම දුරකථනයකින් දෙමාපියන් අහක බලන වෙලාවක් බලා ඕන නැති ඒවා බලන්නට ‍දරුවන් නොපෙළඹෙතැයි සිතන්න බැරි ය.

ඒ නිසා ගුරුන් පමණක් නොව දෙගුරුන් ද මේ වාරණයට ලක් විය යුතු ය.

එවිට ජංගම දුර කථන මුලුමනින්ම රටින් තුරන් කරලිය හැකි ය.

අන්තර් ජාලය ද මෙවැනි ම චෝදනාවට ලක් වූ මෙවලමකි. ඊළගට ඉවත් කිරීම සදහා සළකා බැලිය යුත්තේ එයයි.

අප යන්නේ අතීත ශ්‍රී විභූතිය කරා බැවින් ඇත්තටම මේ එක මල ඉලව්වක් නැතිව ඒ දෙසට ගමන් කළ හැකි ය. එසේ තිබියදී මේවා කර තබා ගන්නේ මක්කට ද?

එක අතකට මේවා අප වැනි රටවල් ගිල ගන්නට මාන බලන අධිරාජ්‍යවාදී කුමන්ත්‍රණකරුවන් විසින් වුවමනාවෙන් අපට හුරුකරන ලද මෙවලම් ය. වෛරස් ය. අපේ මුතුන් මිත්තන්ට මේවා තිබුනේ නැත කියා අඩුවක් වී ද?

අපේ රටවල පරිහානිය ඇති කර මේ ලෝ තලයෙන් සිංහල බෞද්ධ හැදියාවම නැති කර දැමීම උන්ගේ අභිප්‍රාය ය. අපේ නායක තුමා සිටිනා තුරු ඒ වැඩය පහසුවෙන් කර ගන්නට නම් උන්ට ඉඩ ලැබෙන්නේ නැත.

එතුමාගේ දෑත් දෙපා පමණක් නොව සරුවාංගයම ශක්තිමත් කර තවත් යුග ගණනාවක් එතුමාටම රට බාර දිය යුත්තේ ඒ නිසා ය.

එතුමාට ත්‍රිවිධ රත්න‍යේ සරණයි! මර්වින්ගේ ආරක්ෂාවයි!

Advertisements
Posted in: Uncategorized