ඊනියා දේශප්‍රේමීන්ට රටේ උරුමක්කාරයින් ගෙනියන වංචාවේම සරණයි

Posted on July 28, 2009



අප යුද්ධය සදහා වියදම් කර ඇති මුලු මුදල රුපියල බිලියන 23000 ක් වෙතැයි ආණ්ඩුවෙන්ම ප්‍රකාශයට පත් වූයේ මෑතකදී ය. ඒ නියෝජ්‍ය මුදල් අමාත්‍ය රංජිත් සියඹලාපිටිය මහතාගේ මුවිනි.

ඉහළ කොත්මලේ ජලාශය සදහා වැය වන මුදල රු බිලියන 30 කි. නොරෙච්චොලෙයි තාප විදුලි බලාගාරය සදහා වැය වන මුදල රු බිලියන 51 කි. රුපියල් බිලියන 23000 කින් කොපමණ දේ කරන්නට තිබිණි දැයි වැටහීමක් ඔබට ඉන් ලැබෙනු  ඇත.

අප මේ වනවිට ජාත්‍යන්තර මුල්‍ය අරමුදලෙන් අනුමත කර ගෙන ඇති මුලු ණය ප්‍රමාණ‍ය වන රු බිලියන 299 මෙන් එය 75 ගුණයකි.

තවම වියදම් අවසන් වී නැත.

අවතැන් වූවන් දිගේලි කළ එලිමහන් සිර කදවුරු රජය සෑහීමකට පත්වන තුරු පවත්වාගෙන යාමටත් තෝරාගත් අය නැවත පදිංචිකිරීමටත් ඉතිරි අය ‘පුනරුත්ථාපනයටත්’ යුද්ධයෙන් විනාශ වූ ගෙවල් දොරවල් පමණක් නොව ජීවන රටා ද නැවත ගොඩ නැගීමටත් තවත් විශාල මුදල් කන්දරාවක් අවශ්‍ය ව තිබේ.

යුද්ධයෙන් තුවාල කරනු ලැබු මනස්වලට ප්‍රතිකාර කිරීම සදහා ද නැවත එවන් යුද්ධයක් ඇති නොවීම සදහා ද කළ යුතු වියදම් මීට අතිරේඛව ය.

අප දිගින් දිගට බ්ලොග් සටහන් ලීවේ මේ අතිවිශාල විනාශයත් එයින් රටට සිදු වූ සිදුවන හා සිදුවීමට නියමිත විනාශය හා වියදම ගැනත් සංවේදනාවෙන් ය.

අප යුද්ධය අවසන් වූ පසුත් නැවත මෙවන් දෙයක් හිස එසවීමට ඇති ඉඩකඩ අහෝසි කිරීමේ වැදගත් කම කීවේ ද ඒ සංවේදනාවෙන්ම ය.

තව තවත් ලෝකයට ණය වීමටත් ලෝකයා කියන පදයට නැටීම සිදුවීමටත් මේ විනාශය හේතු භූත වූ බව හා වන බවත් අපි නැවත නැවතත් කීවෙමු.

ලෝකයාට බම්බු ගහන්න යැයි ගැලරියට ඇහෙන්න කෑ ගසමින් ලෝකය ඉදිරි‍යේ දණින් වැටී ආධාර ඉල්ලීමේ ඊනියා නාඩගම ද අපි හෙලිදරව් කළෙමු.

ඒ කළේ ද ලොව ඉදිරියේ කෙළින් සිට ගතහැකි ජාතියක් ගොඩ නැගීමට අවශ්‍ය මානසික පරිසරය සකස් කිරීමට ය. සමාජ වටපිටාව සකස් කිරීමට ය.

එහෙත් මත් වූ බොහෝ දෙනෙකු මේ බලාපල්ලා අපි කෙලින් යනවා යයි පාරම්බාමින් ඇදේට යන ආකාරයටම අපේ රටේ උරුමක්කාරයෝ ද හැසිරෙති.

අපට දේශද්‍රෝහීන් යයි ගරහන බොහෝ දෙනෙකු රටේ අවාසනාවට සැබෑ දේශද්‍රෝහීන් හදුනාගෙන නැත.

උන් කෙළින් යනවා යයි කී පමණින් එය එසේ යයි විශ්වාසයට ගෙන අපට දෙහි කපන ඊනියා දේශප්‍රේමීන් සිදු වූ දේ තේරුම් ගන්නා විට ලංකාව පසුකර ගෙන බංග්ලා දේශය හා සමහරවිට සෝමාලියාව ද ඉදිරියට ගොස් තිබෙන්නට පුලුවන.

ඊනියා දේශප්‍රේමීන්ට රටේ උරුමක්කාරයින් ගෙනියන වංචාවේම සරණයි!

Posted in: Uncategorized