සිසු සිසුවියන් සිය දිවි හානි කර ගැනීමට තිත තියන්නට බලධාරීහු තීරණය කරති

Posted on July 28, 2009



අධ්‍යාපන විශේෂඥයන් පිරිසක් රැස්වී උද්ගත වී ඇති තත්වය සාකච්ඡා කළහ. එන පොට හොද නැත. එක් පාසලක ජංගම දුරකථන හුටපටයක් නිසා සිසුවියන් දෙදෙනෙක් සිය දිවිනසා ගන්නට උත්සහ ගත් අතර එක් උත්සහයක් සාර්ථකව තිබිණි. තවත් තැනක කණේරු ඇට කා සිසු සිසුවියන් අටක් රෝහල් ගත කරන්නට සිදුවූ අතර එක් අයෙකුගේ දිවි අහිමි වී තිබිණි.

කුමක් හෝ කළ යුතු ය.

ජංගම දුර කථන තහනම් කිරීමට ඉක්මන් තීන්දුවක් ගනු ලැබිණ. දැන් සාකච්ඡා කරමින් සිටින්නේ ගත හැකි අමතර පියවර ගැන ය.

ටයි පටියක් නොතිබුනේ නම් කොළඹ සිදුවු සිය දිවිනසා ගැනීම නවත්වා ගන්නට තිබූ බව විද්වතුන්ගේ විශ්වාසය විය. වහාම ක්‍රියාත්මක වන පරිදි පාසල්වල ටයිපටි තහනම් කරමින් චක්‍රලේඛනයක් නිකුත් කිරීමට තීරණය විය.

ඇත්තටම සියදිවිනසා ගැනීමට උත්සහ කර තිබුනේ වැසිකිළියක දී නිසා වැසිකිළි සම්බන්‍ධයෙන් කිනම් සම්බාධක පැනවිය යුතු දැයි තීරණයක් ගැනීමට අතුරු කමිටුවක් පත්කිරීමටත් මහජනයාගෙන් ඒ ගැන අදහස් විමසීමටත් තීන්දු කෙරිණි.

කණේරු ගස් වද කිරීමට (සිරස මාධ්‍ය ජාලයේ නොව) රාජ්‍ය මාධ්‍යයේ සහය ලබා ගෙන දීප ව්‍යාප්ත වැඩ සටහනක් දියත් කිරීමටත් කණේරු වද කිරීමේ සතියක් ප්‍රකාශයට පත් කිරීමටත් තීන්දු විය.

පෙම් සබදතා ඇතිවන්නේ එක්කො මිශ්‍ර පාසල් පැවතීම නිසා ය. නැත්නම් ටියුෂන් කඩ පැවතීම නිසා ය. මේ දෙකම තහනම් කිරීමේ ඉඩකඩ ද පරීක්ෂා කිරීමට සුවිශේෂ කමිටු තුන හතරක්ම පොලිස් දෙපාර්තමේන්තුව අනුයමින් පත් කළ යුතු යයි කළ යෝජනාවට විශාල සහයක් ලැබිණ.

සිය දිවි නසා ගැනීම් ගැන ප්‍රවෘත්ති මාධ්‍යවල පළ කිරීම තහනම් කිරීමේ යෝජනාවක් ද සාකච්ඡාවට භාජනය වූ අතර මිනීමැරුම් හා සියදිවිනසා ගැනීම් නැතිව යුද්ධයත් අවසන් වී ඇති තත්වයක් යටතේ පත්තර පවත්වාගෙන යා නොහැකිවනු ඇතැයි පත්තරේට සම්බන්ධ විද්වතෙක් කණගාටුවට පත්විය.

ළමයි සියදිවි නහගන්නේ ගුරුවරුන් අයුක්ති සහගත ලෙස බණින නිසා ය. ගුරුවරුන්ගේ ක්‍රියාකලාපයන් හදන්නට නොහැකි නිසා කණේ ඇබ ගසා ගැනීමට පාසල්වල ඇබ ව්‍යාපෘතියක් ආරම්භ කළ යුතු යයි තවත් යෝජනාවක් ඉදිරිපත් විය. වැරැද්ද ගුරුවරුන්ගේ යයි පිළිගැනීම කෙසේවත් නොකළ යුතු යැයි කියමින් ඒ යෝජනාව සාකච්ඡා නොකරම අයින් කර ගන්නා ලදී.

කෘමිනාශක තහනම් කිරීමේ අවශ්‍යතාවය ද මෙහිදී ඉදිරිපත් විය. ගම්වල වැඩි‍දෙනෙක් සියදිවි හානි කරගෙන තිබුනේ කෘමිනාශක භාවිතා කිරීමෙනි. රේල්ලුවට බෙල්ල තබන්නට හැකි නිසා දුම්රිය මාර්ගය දෙපස විශාල වැටක් ඉදිරිපත් කළ හැකි ද යන්න ද සාකච්ඡා විය.

සහභාගී වූ එකෙක් ඇසූ ගොන් ප්‍රශ්නයක් නිසා සභාව තීන්දු තීරණ නොගෙනම අවසන් විය.

ඒ ගොන් ප්‍රශ්නය වූයේ  මේ තත්වයට අධ්‍යාපන ප්‍රතිපත්ති හෝ අධ්‍යාපන බලධාරීන් හේතු වී නැත් ද යන්න ය.

Advertisements
Posted in: Uncategorized