අවසානයේ ජයගත්තේ කාගේ සත්‍යය ද?

Posted on July 9, 2009



අවසානයේ සත්‍යය ජය ගනී.

උතුරු යුද බිමේ වැටෙන් එහා පැත්තේ දුෂ්කර තත්වයන් යටතේ සේවය කළ වෛද්‍යවරුන් තමන් ඒ දිනවල ඉදිරිපත් කළ සංඛ්‍යාලේඛන එසේ ඉදිරිපත් කළේ එල්ටීටියට බියෙන් බව මාධ්‍යවලට ප‍්‍රකාශ කළ බව ආරංචි විය.

ඒ ආරංචිය අපේ සහෝදර බ්ලොග්කරුවෙක් ලියා තිබුනේ අවසානයේ සත්‍යය ජය ගනී තේමාව යටතේ ය. ඔහුට අනුව මාධ්‍යයට කරන ලද මේ ප‍්‍රකාශ නිසා එල්ටීටියට කඬේ ගිය ඒ සංඛ්‍යාලේඛන උපුටා ගෙන ප‍්‍රකාශයන් කළ සියලූ දෙනාගේ රෙදි ගැලවී තිබේ.

ඇත්තටම පන්හිඳ ලියන මේ බ්ලොග්කරුවාගේ සතුට කොතෙක් ද යත් රෙදි ගැලවීම වඩා සුන්දර කරනු වස් ඔහු විසින් ගලවන ලද රෙදි නිකම්ම රෙදි ලෙස නොව කලිසම් වේට්ටි ගවුම් හා සාරි ලෙස සවිස්තරව වනා තිබේ.

අඳෝමැයි!

එදා එල්ටිටියට බයේ කළ ප‍්‍රකාශය හා අද රජයේ මර්දන හස්තයට බයේ කරන ප‍්‍රකාශ අතර වෙනසක් තිබිය හැකි ද?

ප‍්‍රජාතන්ත‍්‍රවාදය අහෝසි වී ගිය වටපිටාවක පැවතිය හැක්කේ බොරුවට පමණකි. එය එක්කෝ එල්ටීටි බොරුය. නැත්නම් ආණ්ඩුවේ බොරු ය.

යුද්ධයේදී මුලින්ම මියැදෙන්නේ සත්‍යය යයි කියන්නේ එබැවිනි.

රෙදි ගැලවී ඇතැයි අන් අය දෙසට ඇගිල්ල දිගු කරන  තමන් රෙදි ඇඳගෙන ඇතැයි සිතා සිටිනා අය ඇත්තටම තමන් ඇඳ සිටින්නේ කුමක්දැයි නැවත සොයා බැලිය යුතු වන්නේ මෙවැනි බබා පාට් නිසා ය.

Advertisements
Posted in: Uncategorized