මේ මිනිසාත් අපෙන් එකෙකු වෙයි ද?

Posted on July 8, 2009



අවසාන රාජධානියේ නිලමෙලා අත්සන් කළේ දෙමළ බසෙනි. ඒ රජා ද ඉන්දියාවෙන් ආනයනය කරන ලද්දෙකි.

අපේ පන්සල්වල දෙමළ දෙවිවරු වැඩ සිටිති. සමහර උවැසියෝ බුදුගෙයි සිටිනවාට වඩා වැඩි කලක් ඒ දෙමළ දෙවියන් යදිමින් ගත කරති.

අපේ රජවරුන්ට සිහල බිසෝවරු ලස්සන මදි විය. බොහෝවිට බිසවුන් වහන්සේලා ආනයනය කරන ලද්දේ ඉන්දියාවෙනි.

අපට සිටියේද දෙමළාට සිටි අප්පච්චිලා ය.

අනේ අප්පොච්චියේ මෙහෙව් කලවම් ජාතියක්! සුද්ද ලේ ම ඉල්ලා ඇඩුවාට!

ලෝකය සෑදී ඇත්තේ මිනිසුන්ගෙනි. එකිනෙකට වෙනස් මිනිසුන්ගෙනි. ඒ වෙනස් මිනිසුන් එක්වී ඊටත් වෙනස් මිනිසුන් බිහිකරමින් සිටින යුගයක අපි ජීවත්වෙමු.

එහෙව් ලෝකයක මානව වාදී දෘෂ්ඨීයකින් සියලූ මිනිසුන් ලෙස බැලිය නොහැකි ද?

ඒ සඳහා ඔවුන් අප මෙන්ම මිනිසුන් බව පිළි ගැනීමත් ඊට සමාන්තරව ඔවුන් වෙනස් බව අපට වඩා වෙනස් බව පිළි ගැනීමත් එක විට අවශ්‍ය ය.

බොහෝ දෙනෙකුට හැක්කේ එක්කෝ වෙනස්බව පිළි ගෙන එසේ වෙනස් උන් පරයින් ලෙස හඳුනා ගැනීමට හෝ ඔවුන් සමාන යයි සිතා සියලූ වෙනස්කම් නිශේධ කිරීමට යෝජනා කිරීම ය.

ඒ දෙකම අන්ත වාදී ප‍්‍රවේශයන් ය.

මම ශ‍්‍රී ලාංකික මිනිසුන්ගේ හර පද්ධතිය පිළි නොගනිමි. එහෙත් ඊට ගරු කරමි.

එසේ කීවේ තම උපන් භූමිය අමතක කර ජීවත්වීම සඳහා  ශ‍්‍රී ලංකාව තෝරාගත් ආතර් සී ක්ලාක් ය. ඔහු ලංකාවේ ජීවත්වූ ජාත්‍යන්තර පුරවැසියෙකි.

ඉදිරි ලෝකය එවැන්නන්ගෙන් සමන්විත වෙයි ද?

පොදු මිනිසෙක් මෙසේ වෙනස් ජාතීන් අතරෙන් බිහිවෙයි ද?

උත්තර නැතත් මේ ප‍්‍රශ්න නැගීමට කැමැත්තෙමි. උත්තර නැති ප‍්‍රශ්න මිනිසුන් සිතන්නට පොළඹවන බැවිනි.

Posted in: Uncategorized