ඊළග දමිළ නැගිටීමට නායකත්වය දෙනු ඇත්තේ ප‍්‍රභාකරන් කෙනෙකු ද? ගාන්ධි කෙනෙකකු ද?

Posted on June 23, 2009



අප (සිංහල ජනතාව) වෙනස් නොවුනහොත් ඊළග දමිළ නැගිටීමට නායකත්වය දෙනු ඇත්තේ ප‍්‍රභාකරන් කෙනෙකු නොව තුවක්කුවෙන් පැරදවිය නොහැකි ගාන්ධි කෙනෙකැයි කෘතහස්ත ජනමාධ්‍යවේදියෙකු වන  87 හැවිරිදි එස් පියසේන මහතා සති අන්ත පුවත්පතකට ප‍්‍රකාශ කළැයි කියා තිබුනේ ලංකාඊනිවුස් වෙබ් අඩවිය යි.

දැන් හොම්බෙන් යන්නට දී තිබෙන බැවින් ද නැවත එන නැගිටීමක් නියපොත්තෙන්ම කඩා දමන්නට සපථ කර ඇති බැවින් ද එහෙම වෙන එකක් නැතැයි ජයෙන් උදම්ව ඉන්නා අය කියන්නට පුලූවන.

එහෙත් බොහෝ දෙනා නොදන්නා කාරණය නම් සමහර මිනිස්සු  නිවටව දිගු කලක් ජීවත්වනවාට වඩා තම අභිමානය වෙනුවෙන් නිදහස වෙනුවෙන් එක් දවසක් හෝ සිංහයෙකු සේ සටන් වැද මියැදෙන්නට සූදානම් බව ය.

ඒ නිසා පියසේන මහතා නිවැරදි ය.

එහෙත්  ඔහු මුළුමනින් නිවැරදි නැත. ඔහුට එක් කරුණක් වැරදී තිබේ. දමිල නැගිටීමක් ඒ ද නො ඒ ද යන්න පමණක් නොව එහි නායකත්වය ගනු ඇත්තේ ප‍්‍රභාකරන් කෙනෙක් ද නැත් ද යන්නත් දමිළ ජනතාව අත පමණක් ඇති තීන්දුවක් නොවන බව ය.

එය (එහි වැඩි බර) ඇත්තේ ද අප අත ය.  මතුවන ගාන්ධීලා සුදුවෑන් යොදා උස්සාගෙන ගොස් අතුරුදන් කරන්නේ නම් දමිළ අරගලය ගාන්ධිලා නිපදවන එකක් නැත.

සුදු අධිරාජ්‍යවාදීන් තිරශ්චීන වූ බව සැබෑ ය. එහෙත් නිරායුධ ගාන්ධි ඉදිරියේ දිගින් දිගට ආයුධ පාවිච්චි කිරීමට හිත හදා ගැනීමට ඔවුන්ට නොහැකි විය. 

අපට එහෙම අවුලක් නැත. අප ඊට වඩා ම්ලේච්ඡු ය. අපට යටත් වූ මිනිසාට පවා තිරිසන් ලෙස සැළකිය හැකි තරමේ ‘මානුෂිකත්වයක් මෛත‍්‍රියක් කරුණාවක්’  අප සතුව තිබේ.

බිහිවන්නා තීරණය වන්නේ පවතින ඒ වටපිටාව අනුව ය.

Posted in: Uncategorized