ඈතදි බැලූවිට දඹ රන් රේඛා – මෑතදි පෙන්වන බෙදනා රේඛා – පෙරමුණ ගත්විට මැකෙනා රේඛා – රේඛා නැතුවත් ඇඳෙනා රේඛා

Posted on April 25, 2009



ලාංකීය සමාජය විවිධ බෙදුම් රේඛා ඔස්සේ බෙදුණු සමාජයකි.

ඉන් එකක් වන්නේ පිරිමි ගැහැණු රේඛාව ය. පිරිමි ශක්තිමත් ය. දැනුම් තේරුම් ඇති ය. හික්මුණු සද්දන්තයින් ය. ගැහැණු දුර්වල ය. මෝඩ ය. අවසර තැන වරදේ බැඳෙන සුළු ය. මේ නිසා තාත්තලාට කැමති ඇඳුමක් ඇඳ ගෙන දරුවා සිටින පාසලට ගිය හැකි මුත් අම්මලාට ඊට අවසර නැත.

තවත් බෙදුම් රේඛාවක් වන්නේ වැඩිහිටි තරුණ රේඛාවය. ඉන් වැඩිහිටි පැත්තේ ඉන්නේ පරිණත තේරුම් ඇති වගකීමක් දැරිය හැකි පිරිස ය. අනෙත් පැත්තේ සිටින්නේ ලා බාල දැනුම් තේරුම් නැති ගුරු හරුකම් දිය යුතු පිරිස කි. ඒ නිසා උන් වැඩිහිටියන්ගේ උපදෙස්වලට අනුව හැසිරිය යුතු ය. නැත්නම් ගොනා වගේ සිටිය යුතු ය.

ඊලග බෙදුම් රේඛාව ආගම ය. බෙදීම බෞද්ධයින් හා අන්‍යාගාමිකයින් වශයෙනි.  ඉන් එක් පැත්තක ඉන්නේ මෙරටට අයිතිවාසිකම් කිව හැකි භූමි පුත‍්‍රයින් ය. අනෙත් පැත්තෙ ඉන්නේ බෞද්ධයින්ගේ අනුකම්පාව නිසා මෙහි ජිවත්වීමට ඉඩ දී ඇති අන්‍යාගාමිකයින් ය. ඇත්තටම බුදුන් උපන්නේ ඉන්දියාවේ නොව ලංකාවේ යයි හිතෙන තරමට මේ සංකල්පය දුර දිග ගොස් තිබේ. බොහෝ වාහනවල මේ බුදුන්ගේ දේශය යයි ස්ටිකර් අලවා ඇත්තේ එහෙයිනි. අන්‍යාගාමිකයින් බහුලව වෙසෙන පළාත්වල පවා බලහාත්කාරයෙන් බුදු පිළිම ගෙන ගොස් ස්ථාප්තිත කරන්නේ ඒ සඳහා ය.

සිව්වෙනි බෙදුම් රේඛාව වැටී තිබෙන්නේ සිංහල හා අන්‍යජාතිකයින් හරහා ය. එය ද භූමි පුත‍්‍ර ගැටලූවකි. මේ සිංහල අපගෙ රටයි යනුවෙන් ගීත ගායනා කරන්නේ මේ බව නිරන්තරයෙන් කාටත් මතක් කර දීමට ය. සෙසු අය ඉන්නේ සිංහලයින්ගේ අනුකම්පාව යටතේ ය.

පස්වෙනි බෙදුම් රේඛාව කුලය ය. ඇත්තටම ගොවිගම කුලය එක් පැත්තකත් අවශේෂ කුල තව පැත්තකත් හැටියට මේ බෙදීම පවතී. මෙයින් අදහස් කරන්නේ අනෙත් කුල අතර රේඛා නැති බව නොවේ. ඇත්තටම භූමි පුත‍්‍ර පාර්ශවය මෙතැනදී ගොවිගම කුලයයි. සෙසු කුලවල අය පසු කාලයක ලංකාවට කඩා පාත් වෙච්ච අය ය.

සය වෙනි බෙදුම් රේඛාව ඇත්තේ දේශපාලන බලය හිමි ආණ්ඩුව හා විරුද්ධ පක්ෂිකයින් අතර ය. ජීවත්වීම ඇතුළු සියල්ලේ අයිතිය ඇත්තේ ආණ්ඩු පාක්ෂිකයින්ට ය. ඔවුන්ගේ අනුකම්පාව හිමිවෙන තරමට විරුද්ධ පාක්ෂිකයින්ට ද ජිවත්විය හැකි ය. යම් යම් දේ සීමාසහිතව කළ හැකි ය.

(හිරු එෆ් එම් අධිපති දුමින්ද සිල්වා මහතාට තහනම් කරන ලද තම ගුවන්විදුලි සේවාව නැවත ලබා ගැනීමට කිරීමට තිබුනේ බෙදුම් රේඛාව පැනීම ය. බෙදුම් රේඛාවෙන් වැරදි පැත්තට පැන්න ශ‍්‍රීපති සූරියආරච්චි මහතාට හිර ගෙයි ලගින්නට සිදුවුනේ නිල වාහන වැරදියට භාවිතා කළ නිසාම නොවේ. හැම ඇමතිවරයෙක්ම එසේ කරති. එහෙත් එහෙම කිරීමෙන් පසු බෙදුම් රේඛාවෙන් වැරදි පැත්තටම පැනීමට බැරි ය. අද සරණ ගුණවර්ධන ඇමතිවරයාව පොලීසියෙන් සොයතත් හමුවන්නේ නැත. උසාවියේ වරෙන්තුවක් ඇතත් පොලීසියට අල්ලා ගත නොහැකි එතුමා ඊයේ පෙරේදා පොලිස් මුරකාවල් සහිත ජනාධිපති මන්දිරයේදීම ජනාධිපති තුමා බැහැ දැක ගත්තේ ය. ඒ බෙදුම් රේඛාවෙන් හරි පැත්තේ එතුමා සිටිනා නිසා ය. බෙදුම් රේඛාවෙන් හරි පැත්තේ ඉන්නා විට කළ හැකි දේ බොහෝ ය. වැරදි පැත්තේ ඉන්නා විට කළ නොහැකි දේ බොහෝ ය.)

සත් වෙනි බෙදුම් රේඛාව ඇත්තේ ආර්ථික බලය තිබෙන හා නැති අය අතර ය. ආර්ථික බලය තිබෙන අයට හිර ගෙදර වන්නේ ආරෝග්‍යශාලා ය. ඔවුන්ට නැති අය මෙන් හිරේ තපින්නට සිදු නොවේ. ඔවුන්ට සෙසු අය සතු මුදල් වංචා කිරීමේ අවසර පත‍්‍ර ද තිබේ. සෙසු අය ජීවත්විය යුත්තේ ඒ අයගේ අනුකම්පාවේ ප‍්‍රමාණයට ය.

තවත් බෙදුම් රේඛා බොහෝමයකි. නිල බලය ඇති අය හා නැති අය අතර ඇඳෙන රේඛාව එවැන්නකි. සියල්ල මෙහි ලන්නට ගියොත් මෙය අවසානයක් වන්නේ නැත.

ඔබ මේ බෙදුම් රේඛාවන්ගෙන් කුමන පැත්තේ සිටින්නේ ද යන්න අනුව ඔබට සමාජයේ ලැබෙන සම්ප‍්‍රයුක්ත ස්ථානයක් තිබේ. වඩා වැදගත් වන්නේ අන්න ඒ යථාර්තය තේරුම් ගැනීම ය.

ඔබ ආර්ථික වශයෙන් ශක්තිමත් ආණ්ඩුව පැත්තේ සිටින සිංහල බෞද්ධ ගොවිගම වැඩිහිටි පිරිමියෙක් නම් ඔබ වාසනාවන්ත ය.

එසේ නොවන්නේ නම් ඔබට බෙදුම් රේඛාවෙන් එපිටහ ඉන්නා අයගේ අනුකම්පාව මත රැඳීමට යැපීමට සිදුවේ.

ඔබ විමල් වීරවංශ මෙන් ගොවිගම කුලයට අයත් නොවන අනිත් කරුණු අතින් පරිපූර්ණ කෙනෙකු නම් කළ යුත්තේ ගොවිගම කුලයේ ආණ්ඩු පක්ෂයේ ඉන්නා සරත් අමුණුගමට ද වඩා සිංහල වීම ය. එයැයිට ද වඩා බෞද්ධ වීම ය. මල්වත්තේ පන්සල පැත්තේ වැඩි වාර ගණනක් යාම ය. යනවිට එයැයිටද වඩා පඩුරු පාක්කුඩම් ගෙන යැම ය. එයැයිටද වඩා ආණ්ඩුව වෙනුවෙන් වැඩ කිරීම ය. එවිට ඔබට යම් වාසියක් ලබා ගත හැකි ය.

ඔබ කරුණා මෙන් සිංහල බෞද්ධ නොවන එහෙත් අනෙත් කරුණු අතින් පරිපූර්ණ නම්කෙනෙක් නම් කළ යුත්තේ ඩිලාන් පෙරේරාට ද වඩා සිංහල බෞද්ධ වීම ය. දෙමළුන්ට පොලිසියක් ඉඩමක් නොව කිසි දෙයක්  ඕනෑ නැතැයි ද ජනාධිපති තුමාගේ කරුණාව ලැබෙන්නේ නම් ඇතැයි කීම ය.

ඔබ බෝ අක්කා මෙන් පිරිමියෙකු නොවන්නේ නම් කළ යුත්තේ රසික නානායක්කාර වැනි පිරිමියෙකුට ද වඩා පිරිමිවීම ය. පාසල් යන අම්මලාට සාරි ඇන්දවීමට පිරිමින්ට ද වඩා ඉස්සරහ සිට පෙරමුණ ගැනීම ය. සාරිය ගැන වෙනත් අදහස් තිබුන ද සාරියම ශිෂ්ඨ බවේ සංකේතය හැටියට බෞතීස්ම කිරීම ය.

බෙදුම් රේඛාවෙන් වැරදි පැත්තේ ඉන්න අයට හරි පැත්ත ගත හැක්කේ එසේ තමන්ගේ සැබෑ ප‍්‍රතිපක්ෂය වීමෙනි. ආත්මය පාවා දීමෙනි. සිය අනන්‍යතාවය අත් හැර දැමීමෙනි.

ඔබ ඊට සූදානම් නම් (විමල් කරුණා දුමින්ද සිල්වා ඇතුළු පිරිස මෙන්ම) ගොඩ ය.  නැත්නම් ඉතින් ඔබට දෙවියන්ගේ පිහිට ආධාරය පැතීම හැරුණු කොට වෙන කළ හැකි දෙයක් නැත.

මේ තමන්ගේ අනන්‍යතාවය අත්හැර, ප‍්‍රධාන ධාරාවේ අනුකම්පාව මත යැපෙන, ආත්මයකින් මනසකින් තොර කෙනෙකු බවට පත්වීමේ හෝරාවයි. ඔබට ඊට එරෙහි විය හැක්කේ තවත් ටික කලකට ය. දුක් නොවිඳ දැන්ම ඒ වෙනසට හිත හදා ගැනීමෙන් කරදර අඩු කර ගත හැකි ය.

මේ බව දෙමළුන් දැන සිටියේ නම් උන් මේ තරමට දුක් විඳින්නේ නැත.

Posted in: Uncategorized