පරිසරයේ උන්නතිය වෙනුවෙන් ගම අත් හැරීම

Posted on March 25, 2009



නගරය ගැන බොහෝ දෙනා දන්නේ පරිසරයට හානිකර නිර්මාණයක් ලෙස ය. සුන්දර ගමත් කිළිටි වුනු නගරයත් පිළිබඳ කතා බොහෝ ය.

එහෙත් බොහෝ දෙනා නොදන්නා කාරණය නම් ගමට වඩා නගර බිහිවීම පරිසරයට හිතකාමී බව ය.

නගරය යනු කුඩා බිම් ප‍්‍රමාණයක විශාල ජනතාවක් වාසය කරන ස්ථානයකි. එපමණක් නොවේ ඔවුහු ඒ කුඩා බිම් කඩ තුළ සිය රැකියා ද කරති. වෙනත් වුවමනා එපාකම් ද ඉටුකරගනිති.

ගමක ජනයා පැතිර ඇති නිසා ඔවුන්ට විශාල ඉඩක් අවශ්‍ය ය. ඒ නිසාම ඔවුන්ගේ කටයුතු කාර්යක්ෂම නැත. ප‍්‍රවාහනය සඳහා විශාල පිරිවැයක් දරන්නට සිදුවන අතර ඒ වෙනුවෙන් ඉන්ධන ද වැයවේ. ගමකට විදුලි බලය සැපයීම පවා විශාල ඒක පුද්ගල පිරිවැයක් දරන්නට වන කාර්යයකි.

ගම බොහෝ දේ සඳහා යැපෙන්නේ ස්වභාව ධර්මයෙනි. ඒ නිසාම එය ස්වභාව ධර්මය මත පටවන බර විශාල ය. අලි මිනිස් හටන් ඇත්තේ ගමේ ය. කැලය ආක‍්‍රමණය කරන්නේ ගැමියන් ය. හේන් වැනි අතිශය පරිසර විරෝධී කටයුතු සිදුවන්නේ ඔවුන් අතිනි.

ගම්වල ඉඩම් මිල අධික නොවන නිසා විශාල ගෙවල් නිම කළ හැකි වෙතත් නගරයේ ඉඩම් මිල අධික නිසා බහුතර ජනතාවකට කුඩා ගෙවල් වලින් සෑහීමකට පත්වන්නට සිදුවේ. විශාල ගෙයකට යන විදුලිය හා සම්පත් කොහොමටත් අධික මිලකින් යුක්ත ය. කුඩා ගෙයක් ගොඩ නැගීමේ පමණක් නොව නඩත්තුවේ ද පිරිවැය අවම ය.

මා මේ කියන්නට යන්නේ අප පරිසර හිතකාමී නම් ගම් වෙනුවට නගර ගොඩ නැගීම ගැන අවධානය යොමුකළ යුතු බවයි. එයින් වන ජීවීන්ට හා වනවාසී ශාඛයන්ට උන්ගේ නිජ බිම් නිදහස් කර දිය හැකි ය.

අලි මිනිස් ගැටුමට පවා තුඩු දී ඇත්තේ උන්ගේ ජීවන විජිතයන් අප විසින් ආක‍්‍රමණය කර ඇති නිසා ය. අකුළාගෙන නගරයට පැමිණිම උන්ට නැවතත් ඒ බිම් උරුම කර දීමකි.

එහෙත් අපේ පමණක් නොව වන ජීවීන්ගේද අවාසනාවට පරිසරය බාර දී ඇත්තේ ආපසු පැරණි රජදරුවන්ගේ යුගයට යාම වෙනුවෙන් පෙනී සිටින ගම උත්කර්ෂත්වයට නංවන කණ්ඩායමකට වීම දෛවයේ සරදමකි.

දැනට “කිළිටි” වූ නගරයේ වෙසෙන ජනතාව “නොකැළැල්” ගමට යැව්වොත් සිදුවන්නේ තියෙන කැළෑ ටිකත් වන ජීවින්ට අහිමිව යාමය. පරිසරයට හෙනහුරා ලැබීමය.

Advertisements
Posted in: Uncategorized