ඇත්තටම ලෝක බැංකුව කියන්නේ මොකද්ද? Beyondframe අහුලාගත් කෝපි කඬේ සංවාදය

Posted on March 24, 2009



ඇත්තටම ලෝක බැංකුව කියන්නෙ මොන වගේ එකක් ද ලංකා බැංකුව වගේ එකක් ද එහෙම ඇහැව්වෙ සුමනෙ.

උඹ දන්න ඉටිගෙඩිය ලෝක බැංකුව කියන්නෙ ලයිට් මෝලක්. මතක ද විමල් වීරවංශ කියනව ප්ල්ග් එකක් ගැන, රනිල් ගහල තිබුනය කියල.  රනිල් ඔය රට ගිහිල්ල එන ගමනක ගෙනාපු ලයිට් මෝලක්! ගෙනාපු විදිහත් ඇස් දෙකෙන් දැක්කා සේ මල්ලිකා කියාපි.

ප්ල්ග් නැත්තෙ මොකෑ බං ලෝක බැංකුවේ. මේ අපේ ගෙදරත් තියෙන එක. එහෙම නොවෙයි, ගෑණියෙ, මතකද උඹට ඒ දවස්වල රනිල් ලොක්කා  ඕක ඇතුළෙ රිංගනව කියල ලොකු කතාවක් ගියේ. ඒ දායකත්වය කසිප්පු සයිමා ගෙන් ය.

ඕන් දැන් අපේ කට්ටියත් යනවලූ. ආණ්ඩුවේ ඇමැත්තෙකුත් ලගදි රිංගුවාය කියන්නේ. මට නම් හිතන්නේ රට කසියා තිප්පොළක් කියලයි. ඒ කසිප්පු සයිමාගෙ ගෑණිගේ අදහස ය.

මට නම් හිතෙන්නේ ලොකු හාමුදුරු කෙනෙක් හරි පාදිලිකෙනෙක් හරි කියල. මතක නැත්ද උඹට රනිල් ලෝක බැංකුව ඉදිරියේ දණ ගැහැව්වයි කියනව. වෙල අද්දර ගෙදර පොඩි රළහාමි කියාපි.

ටිල්වින් නම් කියන්නේ දැන් ඉන්න අයත් දණ ගාගන ම යයි කියල වන්දනාවෙ! සුමනෙ ආයි කට ඇරිය.

මම නම් කියන්නෙම රට කසිප්පු තිත් පොළක් කියල. අපේ එකාත් ඕවාට රිංගුවට පස්සෙ ගෙදර එන්නෙ දණ ගාගන තමයි   – ඒ සයිමගේ ගෑණි ආයිත්.

වන්දනාවෙ යන තැනක් වෙන්න බැරි ද? ලයිට් මෝලකුත් තියෙන, අහල පහල කසියාත් තියෙන, ඇතුලෙ පූජකයොත් ඉන්න, වඳින්න ඕන බැතිමතෙක්ව පක්ෂ පාට සළකන්නේ නැතිව පිළිගන්න, පඩුරු පාක්කුඩම් ඔප්පු කරන්න පුලූවන්, දුක කියන්න පුලූවන්, ඒ නිසාම කැත නැතුව දණ ගහන්න පුලූවන්, තැනක් වෙන්න බැරි ද? මල්ලිකාත් අත අරින්නේ නැත.

මේකයි බාං වැඬේ, දේවාලෙකට නානා ප‍්‍රකාර අය එනවා. සමහරු එන්නෙ වස්කවි කියන්න. වස්කවි කියපු ඒකා ට සෙත් කවි කියන්න ඊට පස්සෙ තවත් අය එනව. දේවාලේ කපුවා වැඩ දෙකම බාර ගන්නව – සුමනෙ කියාපි.

ප‍්‍රශ්නෙ තියෙන්නේ රනිල් වගේ දේශද්‍රෝහියෙක්  ඕකට රිංගන එක නොවැ. අපේ ඇමැත්තන්ල නම් කමක් නැහැ. පැත්ත ගියත් රනිල් වගේ රට පාවලා දේ යැ? රනිලය යන්නේ රටට වස්කවි කියන්න. අපේ අයියල යන්නේ සෙත් කවි කියන්න. වෙනස ඒකනෙ. පොඩි රළහාමිත් ආයි කට ඇරිය.

අපේ අය ගියාට කමක් නැහැ කියලද ඔය කියන්නෙ සුමනෙ අහපි.

අනේ මන්ද බං ඔය ඉටිගෙඩිය මොකද්ද කියල. හරියට දන්නෙ නැතිව උඹයි මායි කරන මේ හබේ තේරුම මොකද්ද? මට නම් හිතෙන්නේ  ඕක රනිල් ගොයියා රිංගුවොත් රටම අගාධයට යන අපේ ගොයියා රිංගුවොත් රටට කිරි පැණියෙන් උතුරන මොකක් හරි මගෝඩි තැනක්. එහෙම මතක තියා ගත්තහම ඇති යකෝ! සයිම සුමනෙ දිහා බලල තව කුණුහරුපෙකුත් කියල විවාදය තීන්දු කරල අවසන් කළා.

Posted in: Uncategorized