කෝප වුවත් රජ මැතිඳුන් ගත නොහෙනා ….

Posted on March 20, 2009



අපේ සීයාට වදන් කවි සියල්ල කට පාඩම් ය. උන්දෑ ඉන්නා කාලේ මේ කවි යස අගේට ගායනා කළේ ය. අපි වේගයෙන් අතීතය කරා යන මේ ගමනේ මේවා නැවතත් අවශ්‍ය වනු ඇතැයි හැගී ගියෙන් වදන් කවි පොත ගෙන දුවිලි ගසා නැවත පෙරලා බැලූවෙමි.

මගේ හිත නැවතුනේ එහි ඇති එක කවියක ය. එය ඔබත් දන්නවා ඇතැයි මම සිතමි.

තිබූ තැනෙක සොර සතුරන් ගත   නොහෙනා
එ සැඩ මනාවත් වතුරෙන් වල    නොහෙනා
කෝප වුවත් රජ මැතිඳුන් ගත      නොහෙනා
උගත මනා ශිල්පය මයි මතු        රැකෙනා

පැරණි රජ දරුවන් පවා තමන් කෝපයට පත් කළ අය සතු සියල්ල පැහැරගත් බවට මේ කවිය අපට කියයි. ඒ කියන්නේ දැන් මේ වකවානුවේ සිදුවෙමින් තිබෙන්නේ ද අපේ පැරණි රජ දරුවන් කාලයේ සිදුවෙමින් තිබුණු දේ ම බව ය.

ඒ කියන්නේ අපි දැනටමත් අතීතයට, ඒ ශ‍්‍රී විභූතියට, ඒ සමුර්දිමත් යුගයට යමින් සිටින බවය. කාලෙකට පසු අපේම යැයි කිව හැකි පෙර රජ දරුවන් අනුව යමින් තමන් කෝප ගැන්වූ අයට එලව එලවා පහර දෙන නායකයෙකු අපට ලැබී ඇති බවය.

දැන් ඉතින් අධිරාජ්‍යවාදී කුමන්ත‍්‍රණවලින් බේරෙන එක නිකම් කජු කනවා වගේ වැඩකි. රටත් ජාතියත් උන්දෑට බාර දී හිතේ නිස්කාංසුවෙන් අපට දැන් නිදිවැදිය හැකි ය.

සීයා කිවු වදන් කවිය මා ගෙන ගිය දුර!

මොකක් කියෙවුවත් යන්නේ අප මුහුණ දෙමින් සිටින අභාග්‍ය  සිහිපත් කරවීම කරා ය. රජෙකුගේ කෝපය නිසා දහස් ගණනක් මිනිසුන්ගේ ජීවිත මත හිංසනයේ හෙවනැල්ල වැටී  ඇති මේ නරකාදිය කරා ය.

Posted in: Uncategorized