Beyond frame අඩවියට ජනවාරි 10 දාට මාස තුනකි… මේ එහි සිය වෙනි සටහනයි..

Posted on January 6, 2009



මේ බ්ලොග් අඩවියට ජනවාරි 10 දාට මාස තුනකි. මේ එහි සිය වෙනි සටහනයි. මාස තුනක් ඉක්ම යන්නට මත්තෙන් සටහන් සියයක් තැබීමට හැකි වීම ගැන පුංචි සතුටක් අපට ඇත.

අපට ගලින් මුලින් ද මලින් ද සංග‍්‍රහ ලැබිණි. කුණුහරුප ද ඒ අතර විය. කුණුහරුප පළ නොකරන බව කී විට කුණුහරුප වලින් කරන ලද සංග‍්‍රහ නැවතිණි. ඊලගට අපට බ‍්‍රහ්ම දණ්ඩනය පනවන ලද්දේ ය. ඒ සියලූ දේ මැද අප බැලීමට අමුත්තන් 8500 ආසන්න වාරයක් පැමිණ ඇත. මෙයින් 8000 වාරයක් ආවේ අවසන් මාස දෙකේ අප සිංහලෙන් බ්ලොග් සටහන් පළ කරන්නට වීමත් සමග ය. ඒ සඳහා සිංහලයෙන් බ්ලොග් ලිවීමේ තාක්ෂණය ඉගෙන ගන්නට ද අපට සිදුවිය.

අපට දිරිදුන් පාඨක සැමට අපගේ ස්තුතිය මෙයින් පිරිනමන අතර මේ කඩ ඉමේදී අප කවුදැයි අසන අයට අප කවුදැයි හඳුන්වාදීමට ද කැමැත්තෙමු.

බ්ලොග් සටහන් කියවන බොහෝ දෙනෙකුට අප පෙනෙන්නට ඇත්තේ ආණ්ඩු විරෝධින් හැටියටය. ඇත්තටම අප ආණ්ඩු විරෝධී නැත. එහෙත් ආණ්ඩුව කරන බාල වර්ගයේ වැඩවලට අප විරුද්ධය. ඒවායේ සැබෑ තතු හංගා ජනතාව රවටා කරන විට අපේ විරෝධය වැඩිවේ.

අපගේ විරෝධය විරුද්ධ පක්ෂයට එල්ල වුනා නම් එය ඉතා අඩුවෙනි. ඒ ගැරඩි මරා පව් ගන්නට අප අපේක්ෂා නොකරන හෙයිනි. මෑතකදී බලයට පත්වීමට සීමිත හෝ ඉඩක් නැති එයට ගහන්නට මෙන්ම එය මරා ගෙන කන්නට ලෑස්ති වුනු රොත්තක්ම සිටිති. ඒ නිසා අපට එහි ඉඩක් ඇත්තේත් නැත. ඉඩක් ඉල්ලන්නට අප බලාපොරොත්තු වන්නේ ද නැත. කිසියම් විපර්යාසයක් සිදුව බලයට පත්වූ දාකට එයට ද හොඳින් සංග‍්‍රහ කරන්නට අපි බලාපොරොත්තු වෙමු.

ආණ්ඩුව සම්බන්ධයෙන් සත්‍යය එය නොවේ. එය බලූකම් කරන්නට කරන්නට එයට එකතු වන පිරිස වැඩිවන අයුරුද ජනතාව රැවටීම සඳහා ඔවුන් කරන බොරුව බලයේ අනුහසින් සගවන අයුරුද වංචාව හා බොරුව වඩ වඩා උත්සන්න වන අයුරුද අපි දුටුවෙමු. අපගේ විරෝධය ආණ්ඩු කරවන අයට වැඩියෙන් එල්ල වූයේ ඒ අනුවය.

අප කවුදැයි හඳුනාගැනීමට හොඳම විදිහ අපගේ මුල්ම බ්ලොග්සටහන්වල පිවිසීම ය. ඒවා තුළ අපගේ විවේචනයට ලක්වූයේ රටේ ජනතාව ය. ආණ්ඩුව නොවේ. අප අදටත් විශ්වාස කරන්නේ මෙවැනි ඉලව් ආණ්ඩු බලයට පත් වන්නේත් බලයේ සිටින්නේත් ජනතාවගේ ගොන් කම් නිසා බව ය.

මේ ආණ්ඩුව විවේචනය කරන විට වඩාත් අපහසුතාවයට පත්වන්නේ ඊට සහය පළ කරන හා ඒ වෙනුවෙන් කඬේ යන අයට ය. ඒ නිසා ආණ්ඩුව හරහා වුව ද අපේ විවේචනයේ අවසාන ඉලක්කය ජනයා ය (මේ බ්ලොග් සටහන් තුළින් ආණ්ඩු පෙරලියක් කළ හැකි යයි අපි හීනයෙන්වත් හිතන්නේ නැත).

ජනයාට අලූතින් හිතන්නට උගන්වතොත් මිසක මේ රට වෙනස් කළ නොහැකි ය. ජනයාට ඇත්ත හා බොරුව අතර වෙනස ඉගැන්වූ විට බලයේ සිටින අයට පමණක් නොව බලයට පත්වන්නට හිතන අයට ද බොරුව ගෙන යාම අමාරුවෙයි. අපගේ අරමුණ බොරුව ගෙනයාමට අමාරු පරිසරයක් නිර්මාණය කිරීමට ය.

අපගේ බ්ලොග් සටහන් රස විඳින අයගෙන් අප ඉල්ලා සිටින්නේ මේ බ්ලොග් අඩවිය පිළිබඳ පණිවුඩය ඔබගේ හිත මිත‍්‍රයන්ට ද යවන ලෙස ය. බොරුව නිරාවරණය කිරීමේ කාර්යේ දී අප හා එක්වන ලෙස ය. විශේෂයෙන් මෙතෙක් කළාක් මෙන් ඔබගේ වැදගත් ප‍්‍රතිචාරයන්වලින් ඊට දායක වන ලෙස ය. අප වැරදි කරන විට ඒවා පෙන්වා දෙන ලෙස ය. මෙතෙක් ඔබ කලාක් මෙන් අප ඉදිරිපත් කරන මත පළල් සංවාදයකට ලක් කරණ ලෙසය.

Advertisements
Posted in: Uncategorized