ලබන්නාවූ අවුරුද්ද

Posted on December 31, 2008



ලබන්නා වූ අවුරුද්ද අරගල වසරක් වේවා යි පතන්නේ ජවිපෙ නායක සෝමවංශ අමරසිංහය. ලබන්නා වූ අවුරුද්ද සංවර්ධන වසරක් වේවා යි පතන්නේ මෛත‍්‍රීපාල සිරිසේන මැතිතුමාය. ලබන්නාවූ අවුරුද්ද මැතිවරණ වසරක් වේවා යයි රජය පතන බව අපට කීවේ ඌව පළාත් හිටපු ප‍්‍රධාන අමාත්‍යවරයාය. ලබන්නාවූ වසර ආර්ථික අර්බුදයට රට තල්ලූ කරන වසරක් වෙනු ඇතැයි කියන්නේ එජාපයයි. ලබන්නාවූ වසර ප‍්‍රභාකරන් පරදින වසර වනු ඇතැයි කියන්නේ හෙලයේ උරුමක්කාරයින් හා පොල්මක්කාරයින් ය.

ලබන්නා වූ වසර ඇත්තට ම කිනම් ස්වරූපයක් ගනී ද?

එයට උත්තර දන්නේ උඩ ඉන්නා දෙවියන් පමණකි. කටට එන උපහැරණයක් නිසා කියනවා විනා එයාවත් දන්නවාදැයි හරියටම පැහැදිලි නැත. ඒ නිසා අප දන්නා කරුණු කාරණා අනුව කුමන ආකාරයේ වසරක් වනු ඇත් දැයි අනුමාන කිරීමට බලමු.

කුමක් වුවත් එය අරගල වසරක් වන්නේ නම් නැත. මක්නිසාද යත් අරගලය පාවා දී දැන් ගොඩක් කල් නිසා ය. වත්මන් තත්වය යටතේ අරගල කිරීම දේශද්‍රෝහී බව ජවිපෙ පවා අදහන නිසා ය. මේ අරගල වසර පිළිබඳ කතාව ඔවුන් කියන්නේ පිට පිට තුන්වෙනි වතාවට නිසා ය. දෙවරක් කීවේ ලාල් කාන්තය. දැන් කියන්නේ සෝමවංශය. ඒ  අර්ථයෙන් හැර මෙහි අලූත් යමක් නැති නිසා ය.

එය සංවර්ධන වසරක් නම් වෙන එකක් නැත. වෙනවා නම් සංවර්ධනය වනු ඇත්තේ රට කරවන්නන් පමණ ය. අප එසේ කියන්නේ පහුගිය වසර දෙකේ අත්දැකීම්වලට අනුව ය. බොහෝ දෙනෙකුගේ අග පසග පිළිබඳව කරන ලද පරීක්ෂණයකින් පසුව ය. ඔවුන්ගේ ශරීරවලින් සංවර්ධනයේ මෙතෙක් තරම කිව හැකි නිසා ය.

එය මැතිවරණ වසරක් වීමේ ඉඩකඩ තිබේ. එහෙත් ඒ ඊළග මැතිවරණවල ප‍්‍රතිඵල අනුව ය. ඒවා සතුටු දායක නොවෙතොත් ඒ බලාපොරොත්තුවත් ඉවත දමන්නට සිදුවේ. සියල්ල කිලිනොච්චිය මත තීරණය වනු ඇත. කිලිනොච්චියත් මිරිගුවක් වාගේ ය. ළග ළග බව දැනෙතත් කිට්ටුවන විට එය ඈත්වේ. මැතිවරණය පිළිබඳ සැබෑ ප‍්‍රශ්නය ඇත්තේ මේ තුළය.

ලබන වසර රට ආර්ථික අර්බුදයකට තල්ලූ කරන වසරක් වනු ඇතැයි කියන්නේ එජාපයයි. උන් කොහොමටත් දේශ ද්‍රෝහී නිසා දේශපේ‍්‍රමී රජය අපහසුතාවයට පත් කරන්නට එසේ කියනවා වන්නට පුලූවන. මිහින් එයාර් වගේ පාඩු ලබන ආයතනයක් නඩත්තු කිරීමට පවා තමන් සතුව අරමුදල් ඇතැයි රජය විසින් ඔප්පු කර තිබියදී ආර්ථික අර්බුදයක් ඇතැයි සිතන්නට කොහොමටවත් බැරි ය. සියලූ වරප‍්‍රසාද සහිතව සිියයකට අධික කැබිනට් මණ්ඩලයක් නඩත්තු කළ හැකිව තිබිය දී ආර්ථික අර්බුදයක් ඇතැයි කියන කාරණය කොහොමටත් පිලිගන්නට බැරි ය.

ලබන වසර ප‍්‍රභාකරන් පරදවන වසරක් වේ යයි විශ්වාසයක් පවතී. අවසානයේ අපට ලබන වසර සම්බන්ධයෙන් සත්‍යයයි සිතිය හැකි එකම කාරණය එයයි. ගිය වසරේද ප‍්‍රභාකරන්ට ඊලග උපන් දිනය සමරන්නට නොලැබෙතැයි ලොකුම තැනකින් සහතිකයක් පවා අපට ලැබිණ. ඒ සහතිකය මේ වසරේ මෝසම් මාසයේ හැමූ සුලගත් සමග හුලගේ ගියේ ය. මෙවර උපන්දිනයේ වත් එය අලූත් වූයේ නැත. ඒ නිසා ඒ ගැනද පුංචි විචිකිඡ්චාවක් ඇත.

පෙනෙන විදිහට මේ අවුරුද්දත් වෙන අවුරුදු වාගේම වීමේ ඉඩකඩ මේ නිසා වැඩිය. ඒ නිසා වෙනත් අවුරුදු වාගේම මෙය වංචාවේ හා බොරුවේ වසරක් වනු ඇතැයි අපට හැගේ.

එවැන්නකට මුහුණ දීමට අවශ්‍ය ශක්තිය ධෛර්ය හා විශේෂයෙන් ඉවසීම අපගේ පාඨකයින්ට- ඔබට- ලැබේවායි අපි ඉතසිතින් පතමු.

Advertisements
Posted in: Uncategorized