අවබෝධතා ගිවිසුමෙන් නිරාවරණය වූ හෙලූව

Posted on December 28, 2008



දේශපාලනයේ දී වචනයෙන් පමණක් නොව ලිඛිතව ද දුන් පොරොන්දු කඩ කිරීම අපේ රටේ නම් දැරූ චාරිත‍්‍රයකි. එය රාජපක්ෂට ද කලින් ආරම්භ කළ නාඩගමක් වූ අතර මේ බොහෝ අවබෝධතා ගිවිසුම් සම්බන්ධයෙන් විමල් වීරවංශට ද අමතක කළ නොහැකි දීර්ඝ අතීතයක් ඇත.

විමල් වීරවංශ හිටි ජවිපෙට මුලින්ම ලිඛිත පොරොන්දුවක් දුන්නේ චන්ද්‍රිකා ය. ඇගේ පොරොන්දුවට අනුව තුන් මසක් ඇතුළක විධායක ජනාධිපති ක‍්‍රමය අහෝසි කිරීමට නියමිතව තිබූ අතර ඒ පොරොන්දුව නිසා ජවිපෙ මැතිවරණයට තරග කිරීමෙන් වැළකී සිටින බව ප‍්‍රකාශයට පත්විය. අන්තිමේදී ජවිපෙ මැතිවරණයට තරග නොකළ නමුත් චන්ද්‍රිකා තම පොරොන්දුව ඉටු කළේ නැත.

එජාපය සමග අවබෝධතා ගිවිසුම අත්සන් කළ පසුදාම එජාපයෙන් පැමිණි 17 දෙනා පිළිගෙන ඒ අවබෝධතාවයට පයින් ගැසීමට රාජපක්ෂ කටයුතු කළේ ය. ඒ නිසා පොදුවේ රාජපක්ෂ හා අවබෝධතා ගිවිසුම් සම්බන්ධයෙන් ඇත්තේ ද ඊට නොවෙනස් කතාවකි.
එය එජාපය සම්බන්ධයෙන් පමණක් නොව වෙන  ඕනෑම කෙනෙකු සම්බන්ධයෙන් වලංගු බව රාජපක්ෂ කියා සිටියේ තමන්ගේ දකුණත් සවු මංගල සමරවීරත් තමන්ගේ මැතිවරණ ව්‍යාපාරයේ බර ඇදි ශී‍්‍රපති වත් පස්සට පයින් ගසා එලවා දැමීමෙනි. ඒවා වාචික අවබෝධතා වූ බව සැබෑ ය. එහෙත් ඒවාත් අවබෝධතා විය.

බොහෝ ජයගොස නගා ජවිපෙ සමග ඇතිකරගෙන තිබුන ලිඛිත අවබෝධතා ගිවිසුම ද මහින්ද රාජපක්ෂ කඩ කළේ ය. ඒ ජවිපෙන් පළාත් සභා මැතිවරණය සඳහා තරග වැදීම සඳහා ඉවත්වූ මන්ත‍්‍රීවරයාගේ මන්ත‍්‍රී පදවිය උදුරාගෙන කරුණාට දීමෙනි.

ජවිපෙට අවබෝධතා ගිවිසුම් සම්බන්ධයෙන් ඇතිවිය යුත්තේ එක පාරක් නොව කීප පාරක් බැට කෑමෙන් ඇතිවූ ඉතා අමිහිරි මතකයන් ය. ඊයේ පෙරේදා වනතෙක්  ජවිපෙ තුළ සිටියාවූ ද අදත් දේශපාලනයේ නියැලෙන්නාවූද විමල්ට ඊට වෙනස් මතකයක් මේ සම්බන්ධයෙන් තිබිය නොහැකි ය.

එහෙත්  ඒ පිළිබඳ වගේ වගක් නැතිව ඔහු අවබෝධතා ගිවිසුම් ගසයි.

ඒ පිළිබඳ උත්සවය පැවැත්වුනේ ජනාධිපති මන්දිරයේම ය. එය ඓතිහාසික එකක් කරන්නට රජයේ මාධ්‍යයන් කොතෙක් උත්සහ කළ ද එහි පිලූනු ගඳ වහන්නට ඒවාට නොහැකි විය. සහභාගීවූවන් තුළ පවා ඒ පැරණි නාඩගමේ බාල කොපියක චරිත රගන්නට වීම පිළිබඳ ප‍්‍රසාදයක් තිබුනේ නැති තරම් ය.

මේ සියල්ල ජනතාව රවටා ගජ මිතුරු දේශපාලනයේ නිරත වන්නට ය. හයියෙන් කෑ ගැසුවාට විමල්ට ආත්මයක් නැත. මේ ගිවිසුම මගින් ද පෙන්නුම් කළේ ඒ ආත්මයෙන් තොර නැවත නැවතත් දැකීමට අප‍්‍රිය සහගත විමල්ගේ හෙලූව ම ය.

Advertisements
Posted in: Uncategorized