ගමේ වීරයින් හා නගරයේ හාල් පාරුවන්

Posted on November 26, 2008



මාධ්‍ය විසින් ද උඩ ගෙඩි දෙනු ලැබ අප විසින් මෑත කාලයේ හදාගන්නා ලද බෙදුමකි ඒ. මේ බෙදුමට වඩාත් සංවේදී වූ ආයතන අතර ඉතාම තාර්කික විශයයක් පිළිබඳව නම් දරා ඇති ආයතනයක් වූ මොරටු සරසවිය ද කැපී පෙනෙයි. මේ කණ්ඩායම් අතර අවුලූවන ලද ගැටුමෙන් මොරටු සරසවිය මෑත කාලයේ දී බොහෝ වාර ගණනක් වැසුනු අතර දෙපැත්තේම අය තුවාළ සහිතව රෝහල් ගත කිරීමට ද සිදුවිය.

මාකට් කරන්නට හැකි නම්  ඕනෑම මළ ජරාවක් රස කර කර වනන්නට බොහෝ මාධ්‍ය ආයතන පැකිළෙන්නේ නැත. එසේ වනන දෑ රස කර කර වළඳන්නට ජනතාවගෙන් වැඩි දෙනෙක් ද සැදී පැහැදී සිටීම ඔවුන්ට විශාල වාසියක් ව තිබේ. ජනයාට විකිණිය හැකි නම්  ඕනෑම ආකාරයේ බෙදුම් රේඛාවක් මවන්නට ඔවුන් සූදානම් ය.

ගැටලුව එයම නොවේ. මවන්නා වූ මේ බෙදුම් රේඛා ඔස්සේ මිනිසුන් විසින් කඳවුරු බැඳගැනීම ය. මේ කඳවුරු පසු කලක ජීවමාන යතාර්තයන් බවට පත් වී ඒවා අතර ගැටුම අපේ ජීවිතය ඩැහැ ගනී. අනෙකාට කෙළවීම තුළ අපේ ජය සනිටුහන් වෙතැයි අපට සිතෙන්නට පටන් ගන්නේ ඒ අනුවය.

මේ ගැන කතා කරන්නට සිතුනේ නොවැ 23 දින රූපවාහිනියේ ගිය අපේ ගම වැඩසටහන තුළින් නගරයට එරෙහිව ගම ගැන ජේ ආර් පී සූරියප්පෙරුම මහතා පළ කළ අදහස් නිසාවෙනි. වැඩි දෙනෙක් අසන්නට කැමති දෙය කීම නිසා ජනපි‍්‍රය විය හැකි වුවත් එයින් රටට ප‍්‍රයෝජනයක් නම් අත් නොවේ.

බුද්ධාගමේ ද කතෝලික ආගමේ ද කියා විමසන්නේ නැතිව සිංහල ද දෙමළ ද කියා වෙනසක් නැතිව ගොවිගම ද කරාවේ ද කියා සොයන්නේ නැතිව ගමේ ද නගරයේ ද කියා ලේබල් අලවන්නේ නැතිව මිනිසුන් දිහා බලන්නට අප හුරුවන්නේ කවදා ද?

ජනතාවට ඉදිරි දර්ශනයක් සපයනවා වෙනුවට ඔවුන් තුළ ඇති දුර්ගුණාංග හා නොදැනුවත්කම උපයෝගී කරගනිමින් වෙනස්කම් මවා ඒවා ඔවුන්ටම විකුණා මුදල් ගරන්නට ඉදිරිපත් නොවන මාධ්‍ය සම්ප‍්‍රදායක් ගොඩ නැගෙන්නේ කවදා ද? එවැනි දිනයක් උදාකරගැනීම සඳහා පුංචි හෝ තල්ලූවක් අපගේ බ්ලොග් අඩවිවලින් වත් සැපයිය නොහැකි ද? මේ සටහන ලිව්වේ ඒ අරමුණෙනි.

Advertisements
Posted in: Uncategorized