ජාතිය වෙනුවෙන් පැටව් ගැස්සවීම

Posted on November 25, 2008



 

ඉදිරියේ එන අනතුරින් ජාතිය බේරාගැනීම සඳහා වැඩි වැඩියෙන් දරුවන් වැදිය යුතුව ඇතැයි නොවැ 25 පුවත්පතක පළවී තිබිණි. මේ අදහස අද ඊයේ එකක් නොවේ. එය නැවත මෙසේ හිටිහැටියේ කරලියට ආවද මේ තර්කය සෑහෙන පරණ තර්කයකි. ගුණය නොව ප‍්‍රමාණය පිළිබඳ මේ වුවමනාවෙන් පෙන්වන්නේ එක් අතකින් මේ කියන අයගේ මුග්ධ කමය. අනෙත් පැත්තෙන් ඔවුනගේ අලස කම ය.

පින් මඳ පුතුන් සියයක් ලදුවත් නිසරු
ගුණ ණැන දෙකින් යුතු පුතුමය ඉතා ගරු
එක පුන් සඳින් දුරුවෙයි ලොව ඝන අඳුරු
නෙක තරු රැුසින් එලෙසට නොම වේය දුරු

ඒ අපේ පැරැුන්නන් ප‍්‍රමාණය හා ගුණය අතර වෙනස ඇඳින ගත් සැටි ය.

ගණන වැඩිකර ගැනීම ඇත්තටම පහසු ය. ඇත්තේ පැදුර පාගන එක විතර ය. එහෙත් ගුණයෙන් ණැනයෙන් යුත් මිනිසුන් සෑදීම අපහසු ය. ඒ සඳහා අධ්‍යාපනය ලැබිය යුතු ය. ලෝකය ගැන දැන ගත යුතු ය. නානා විධ අත්දැකීම් එක් කර ගත යුතු ය.

ගණන වැඩිකර ගැනීම යන මාවතේ ඇත්තේ සංතුෂ්ඨිය හා ප‍්‍රමෝදය ය. ගුණය වැඩිකර ගැනීමේ මාවතේ ඇත්තේ වෙහෙස හා දහඩිය ය.

ඇමරිකාවේ සුදු ජාතිකයින් ජනගහණයෙන් සියයට හැට හයකි. එහෙත් බැරක් ඔබාමා ගුණයෙන් ජය ගත්තේ ය. ප‍්‍රමාණය ඔහුට බාධාවක් වූයේ නැත.

ප‍්‍රමාණය තමන්ගේ බලය තීන්දු කරන එකම සාධකය ලෙස දකින දුර්වල කම්මැලියෙකු හැම තිස්සේම ගොඩ අඩුවීම ගැන බියකින් පෙළෙයි.

අපේ දරුවන්ට (ඉන්න එකාට හෝ දෙකාට* ශක්තිමත් වන්නට උගන්වමු. දැන උගත් වන්නට උගන්වමු. උගතුන් මැද ශිල්ප දක්වන්නට උගන්වමු.

දක්ෂ මිනිසෙකුට මිනිසුන් ලක්ෂ ගණනක් වුව මෙහෙයවිය හැකිය. ඒ හයිය අපි අපේ දරුවන්ට ලබා දෙමු. ඔබාමා උගැන්වූ අප ඉගෙන ගැනීමට අදිමදි කරන පාඩම එයයි.

ප‍්‍රමාණය වැඩිකරගැනීමේ මාවත වැටී ඇත්තේ ගුණය එපමණට අඩුවීම හරහා ය.

මේ බ්ලොග් අඩවිය වෙන්වන්නේ ලෝකය දෙස බොහෝ දෙනා නොබලන කෝණයකින් බැලීමේ කාර්යයට ය. එයද ණැනයෙන් ගුණයෙන් යුත් දරු පරපුරක් සැදීමට අවශ්‍ය පූර්ව කොන්දේසියක් යයි අප කල්පනා කරන බැවිනි.

Advertisements
Posted in: Uncategorized