සරසවිය නැවත අප්සෙට් ය. මෙවර ඒ ඉරණමට ගොදුරුව ඇත්තේ කොළඹ සරසවියයි. කැළණිය වැසුවේ ගම හා සරසවිය අතර ප්රශ්නයක් නිසා ය. රජරට සරසවිය වැසුවේ ද බාහිරින් එල්ල කර ඇතැයි කියන මැර තර්ජනවලට එරෙහිව කරන ලද සිසු උද්ඝෝෂණ නිසා ය. කොළඹ සරසවිය තුළ ගැටුම සිසුන් පාර්ශව දෙකක් අතර කියතත් එයට ද බාහිර දේශපාලනය ද මැදිහත් යැයි කියනු ලැබේ.
මේ සියල්ල පිටුපස බාහිර මැදිහත්වීම් ගැන කතා තිබෙතත් සරසවිය තුළ ගැටුම් ඇති වීමට එකම හේතුව එය නොවේ.මොරටුව සරසවියේ ගම හා නගරය අතර ගැටුම ගැන අපට වෙනම බ්ලොග් සටහනක් ලියන්නට සිදුවුන බව අපේ පැරණි මිතුරන්ට මතක ඇතැයි සිතමු.
සමහරුන්ට සරසවියේ මේ අර්බුද තිබීම හරි ආතල් ය.
මහ ලොක්කයන් යයි සිතා සිටින මුංගේ ඇත්ත තත්වය බලාපල්ලා යැයි කියන්නට ඉන් අවස්ථාවක් ලැබෙන බැවිනි.
ඇත්තටමත් සමහර සරසවි ශිෂ්යයෝ තමන් සමාජයෙන් වෙනස් සුවිශේෂි කණ්ඩායමක් යන මානයෙන් පෙළෙති.
එහෙත් අපට අවශ්ය ඒ සදහා ඔවුන්ගෙන් වාඩුවක් ගන්නට නොවේ. අපිදු කලක් ඔය සරසවියේම ඉගෙන ගත්තෙමු. ඒ නිසා එහෙම ගැටළුවක් අපට නැත.
සමාජය දැක දැනුම් තේරුම් ඇති වූ විට සරසවි වරම් ලබා ගැනීම මහ බක්කක් නොවන බවත් සරසවි තුළ ඉන්නා අය සමහර කරුණු වලදී රටේ ඉන්නා සෙසු උදවියට ද වඩා බබ්බුන් ලෙස රගපාන බවත් අපි තේරුම් ගත්තෙමු. බොහෝ විට රටේ ඇති බොහෝ ව්යාධීන්ගෙන් සරසවි පරිසරය ද එහි ඉන්නා ඇත්තන් ද පෙළෙන බව ද අපට වැටහිණ.
කොළඹ සරසවියේ ශිෂ්ය කණ්ඩායම් අතර ගැටුම වැයික්කිය පිළිබද ප්රශ්නයකි. එක් එක් කණ්ඩායම් බල්ලන් මුත්රා කර තම වැයික්කිය සටහන් කර ගන්නාක් මෙන්ම ඇතැම් සිංහලයන් බුදුම පිළිම තියා තම වැයික්කිය සටහන් කර ගන්නාක් මෙන් නිතර කණ්ඩායමක් ලෙස ගැවසී තම වැයික්කිය සටහන් කර ගෙන තිබිණි.
වැයික්කියට වෙන කෙනෙක් පිවිසීම මාතෘ භූමියට පරයෙකු පිවිසීමට සමාන විය.
ගැටුම ඇති වූයේ එවැනි වැයික්කි ප්රශ්නයක් නිසා ය.
මර්වින්ට තිබෙන මේ ප්රශ්නය මර්වින් විවේචනය කරන දේශපාලනයක නිරත ශිෂ්යයින්ට ද තිබීම හාස්ය ජනක ය. නමුත් සැබෑව එය ය.
රට ගෝත්ර මානසිකත්වයෙන් පෙළෙන කල සරසවියෙන් ඊට වැඩි දෙයක් අපේක්ෂා කිරීම අසාධාරණ ය. මක්නිසා ද යත් විශය දැනුමක් ලැබ තරග විභාගයකින් සමත්වීමෙන් පමණක් මේ ගෝත්රික මනසින් මිදිය නොහැකි නිසා ය.
සිංහල බෞද්ධ රටක BF වැනි බ්ලොග් අඩවියක් තිබීම වැයික්කිය ආක්රමණය කිරීම කි. ඔය ඉලව් යුදෙව් ක්රිස්තියානි රටක ගිහින් කර ගන්නවා යැයි කියමින් අපට කුණුහරුපයෙන් සංග්රහ කිරීම අපගේ තර්කයන්ට එදිරිවනවා වෙනුවට සමහරු තෝරා ගෙන ඇත්තේ ද ඒ නිසා ය.
සංවාද අපේක්ෂා කරන සරසවියකින් එකිනෙකා මරා ගන්නා තත්වයක් ඇති වන්නේ ද ඒ හේතුවම නිසා ය.
යුදෙව් ක්රිස්තියානි මතවාදයට එරෙහි ජාතික චින්තන අරගලයේ ශාරීරික ප්රහාරයන් දියත් කිරීම වෙන් කළ නොහැකි කොටසක් ව ඇත්තේ ද ඒ නිසා ය.
බලය යොදා යටපත් කිරීම උත්කර්ෂත්වයට නංවා ඇති රටකින් මෙයට වඩා වෙනස් දෙයක් අපේක්ෂා කරන අය ඉබ්බාගෙන් පිහාටු බලාපොරොත්තු වෙන අය ය. සරසවිය තුළ රග දැක්වෙන්නේ රටේ රග දෙන නාඩගමේ අතුරු කතාවක් පමණ ය.
![Logic%20of%20life[1]](http://farm4.static.flickr.com/3468/3367281600_2e4ff36af1_t.jpg "Logic%20of%20life[1]")
